'Itzalpeko Emakumeak' erakusketa martxoaren 4an irekiko da

Itzalpeko emakumeak erakusketaren helburua da XX. mendean errepresioa eta jazarpena pairatu zuten emakume aitzindariak ezagutarazi eta omentzea. Bi urte hauetan hainbat herritan egon da ikusgai, eta martxoan Zumaiara itzuliko da. Martxoaren 4tik 26ra egongo da ikusgai, Alondegiko Oxford aretoan.

Antolatzaileek aukera aprobetxatu dute erakusketa osatu eta Zumaiako emakume aitzindariei aitortza egiteko, eta hasierako erakusketa Zumaiara moldatu dute. Horretarako, Zumaiako emakume aitzindarien izenak eta historia jasotzeko lanetan aritu dira Zumaiako Udala eta Erkibe kultur elkartea. Horiek horrela, erakusketaren barruan Zumaiako emakume aitzindarien txoko berezia sortu dute.

Bigarren Errepublikaren etorrerak aurrerapen handiak ekarri zituen emakumeentzat. Baina 1936ko uztailaren 18an Francoren estatu kolpearekin eta ondorengo gerrarekin atzerakada handia pairatu zuten emakumeek, eta Bigarren Errepublikaren aurreko egoerara itzuli ziren, ordura arte emakumeek erabakitzeko zuten ahalmena desagerraraziz. Gerraren eta diktaduraren ondorioz, etxeko zulora sartu behar izan zuten emakume gehienek. Horien guztien artean, badira euren esparruan aitzindariak izan zirenak, ‘abangoardia’ izan zirenak, euren ideia politiko eta sozialekin erabat konprometitu ziren emakumeak; hau da, botere egiturek inoiz menpekotzat hartu ezin izan zituzten emakumeak. Zumaian baditugu adibide batzuk, hala nola, Balendiñe Albizu, Elbira Zipitria, Maria Dolores Arana, Julene Azpeitia edota Inaxi Etxabe.

Horiek eta gehiagoren bizitzak eta ekarpenak errekonozitzen ditu Itzalpeko emakumeak erakusketak. Martxoaren 4tik 26ra bitartean bisitatu ahal izango da espazioa, Zumaiako Oxford aretoan. Astelehenetik ostiralera 18:00etatik 20:00etara egongo da zabalik, eta, asteburu eta jai-egunetan, 12:30etik 14:00etara eta 18:00etatik 20:00etara bitartean. Gainera, herritarrek bisita gidatura joateko aukera izango dute.

Irekiera ekitaldia eta bisita gidatuak

Irekiera ekitaldia martxoaren 4an (larunbata) izango da, 12:00etatik aurrera. Ekitaldiaren ondotik, bisita gidatua egingo da. Parte hartzeko ez da aurrez izenik eman beharko.

Ondoren, beste bi bisita gidatu izango dira: lehena martxoaren 11an (larunbata), 12:00etan; bigarren saioa martxoaren 15ean (asteazkena) izango da, 18:30ean. Bi saio horietan parte hartzeko ezinbestekoa izango da aurrez izen ematea. Horretarako, martxoaren 6tik aurrera kulturetxea@zumaia.eus e-mailera mezua bidali beharko da.