Zabalik dago Olarro Egunean lana egiteko herri ekimenei zuzendutako deialdia

2019/08/07

Datorren irailaren 21ean ospatuko da Olarro Eguna. Ohikoa denez, gastronomiak garrantzia handia izango du eta olagarroa eta itsasoko produktuak dastagai izango dira txosnetan nahiz herri bazkarian. Guzti honek lan handia eskatzen du eta, aurtengoan ere, Zumaiako elkarteei laguntza eskatu nahi die Udalak.

Parte hartu nahi duten taldeek abuztuaren 31a arte izango dute epea izena emateko. Turismo bulegoan, 943 14 33 96 telefono zenbakira deituta edo turismoa@zumaia.eus helbidera mezua bidalita eman daiteke. Taldeei bilera batera dei egingo zaie iraileko lehen astean eta azalpen zehatzagoak emango zaizkie. Bilera horretan lan bakoitzaren betebeharrak zehatz-mehatz zein diren azalduko dira, eta zozketaren ondoren talde bakoitzak zein tokitan lan egitea tokatu zaion jakingo du.

Etekin ekonomiko propiorik gabe modu iraunkorrean lan egiteko eratu diren kirol, kultur edo gizarte mailako elkarteek baino ezingo dute hartu parte. Elkarteok Udalak herriko taldeen artean diru-laguntzak emateko ordurako onartutako oinarri berak bete beharko dituzte. Hau da, Gizarte Segurantzarekin eta Ogasunarekin zorrik ez dutela ziurtatu beharko dute. Horrez gain, euskaraz jarduteko gai izan beharko dute, eta batik bat edariak banatzeko orduan, ez dira adin txikikoak izango.

Bi eginkizun nagusi bete beharko dituzte partehartzaileek. Lehenik eta behin, ostiralean, irailaren 20an, talde bakoitzetik 20 lagun gutxienez, olagarroa mozteko eta brotxetak egiteko konpromezua hartu beharko dute. Bestalde, egunean bertan, olagarro zopa prestatu beharko dute goizean banatzeko, arratsaldean txosnetan brotxetak banatuko dituzte. Taldeek azpiegitura muntatu beharko dute. Edarien kargu ere taldeek euren kabuz egin behar dute. Goizeko 9:00etan hasi eta gaueko 23:00ak aldera arteko lana izango da. Txosna guztiek ordutegi eta prezio berdinak izango dituzte.

Txosnaz aparte, bazkari herrikoia zerbitzatzeko lana ere eskainiko zaio talde bati. 550 lagunentzat izango da bazkaria, eta guztia behar bezala ateratzeko ezarri beharreko azpiegituren kargu egitea eskatuko zaio taldeari: bazkaria atera, txartelak kendu, karpara sarrerak zaintzea eta ondoren txukuntze eta jasotze lanak egitea. 35 lagun beharko dira aurreikusten da.

Montatze-desmontatze lanen koordinazioa Udaletxearen, herri bazkariko arduradunen eta txosnetako kudeatzailearen artean egingo da.

Zabalik dago Olarro Egunean lana egiteko herri ekimenei zuzendutako deialdia