Zumaiarrok Galarretan erremonte jaialdi bat debalde ikusteko aukera izango dugu

2024/05/29

Ekainaren 6an izango da (17:30), eta Oriamendi enpresak eta Udalak hitzartutako ekimena da.

Zumaiar orok erremonte jaialdi bat debalde ikusteko aukera izango du Galarreta pilotalekuan (Hernani). Ekainaren 6an izango da, 17:30ean. Oriamendi enpresak kudeatzen du pilotaleku entzutetsu hori, eta enpresaren eta Udalaren ekimenez sortutako aukera da. Lehiatilan Nortasun Agiria erakutsi, eta sarrera jasoko du herritarrak, pilotalekura sartzeko. 

Sorburua beste jaialdi batean du. Izan ere, ekainaren 30ean, San Pedro bigarrenez eta jaien egitarauaren barruan, erremonte jaialdia izango da Aitzuri pilotalekuan. 19:00etan hasiko da, eta Erremontari Herriz Herri ekimenaren barrukoa da. Hainbat herritan izango dira partidak datozen hilabeteetan, eta aurten, Zumaia ere sartu da zirkuito horretan. Urtez urte indarra hartzen doa Erremontari Herriz Herri. 

Udalaren asmoa da erremontea sustatzen laguntzea enpresari. Herrian, behintzat, ez da ezaguna, eta pilota elkartean, adibidez, ez da lantzen. Bere garaian, aspaldi, izan zen profesional zumaiarrik, Galarreta historikoan partidak jokatzen, baina azkenaldi luzean, ez. Erremontea sustatzeko asmoz, ekainaren 30eko jaialdian ez da sarrerarik ordaindu beharko. 
Zumaiarrok Galarretan erremonte jaialdi bat debalde ikusteko aukera izango dugu