Migel Gutierrezek lortu du sormenerako beka, 'basoa.wav' proiektuarekin

Guztira hiru proiektu aurkeztu dituzte Zumaiako Udalak egindako sormenerako dirulaguntzaren 2023ko deialdira. Kultura batzordeko hiru ordezkarik, eta beste herrietako hiru kultur teknikarik osatu dute epaimahaia, eta guztiek ere aurkeztutako lanen kalitate ona nabarmendu dute. Horiek guztietatik Migel Gutierrezen proiektua aukeratu dute ahobatez.

Gutierrezek sei abesti inguruko EPa sortuko du datozen hilabeteotan, herriko zenbait musikari eta sortzailerekin batera. Oraingoz honakoak dira proiektuan parte hartzera animatu diren zumaiarrak: Maria Zubimendi akordeoilaria, Joxe Mari Azkue bandako zuzendaria eta oboe musikaria, eta, Jon Maia musikari eta letrista.

'Basoa.wav' deitzen da bere proiektua, bi arrazoirengatik. Batetik Zumaia itsasotik begiratu beharrean basotik begiratuko duelako, Artaditik zehazki; hala, bere Artadiko etxeko estudioan sortu, grabatu eta produzituko ditu abestiak, herriko musikari eta sortzaileen ondoan. Bestalde, .wav audio digitalaren formatuaren laburdura erabili du proiektuaren izenburuan, sormen lan honen izaera musikala nabarmentzeko.

GProiektuaren sormen prozesua ere dokumentatuko du Migel Gutierrezek. Sare sozialetan kontu bat sortuko du, jarraitzaileei 'Basoa.wav' proiektuaren bilakaeran murgiltzeko aukera emanez.

Sormena babesteko

Sormen lanak babesteko helburuarekin sortu zuen Zumaiako Udalak beka berri hau, 2022an. Kultur sorkuntza bezala ulertzen dira artistaren imajinaziotik eratorritako edozein obra: literatura, antzerkia edo antzerki testuak, zinema eta ikus-entzunezkoak, dantza, arte plastikoak, eta bestelakoak. Proiektu zehatzak eta beharrezko sormen prozesua barnebiltzen ditu deialdiak. 2023ko deialdian sormenerako dirulaguntzen kopurua 8.000 eurora igo zuen Udalak, eta kopuru bera mantenduko du datorren urtean ere.

Halako ekimenekin, Zumaiako Udalak herritarren parte-hartze aktiboa eta sormena, kultur sormenak gizarte osoaren ongizateari ematen dion balioa kontutan hartuta.

Albiste erlazionatuak