Ostegunetako kinkilleroen azoka Eusebio Gurrutxaga plazan egingo dute aurrerantzean
Orain arte Ondartxo eta Amaia plazetan egiten zen elikagaien eta arropen azoka Eusebio Gurrutxaga plazara lekualdatuko da. Lehenengo aldiz ostegun honetan (hilaren 11n) egingo da kokapen berrian, 08:30etik 13:00etara bitartean.
Ostegun honetatik aurrera (urtarrilak 11) Eusebio Gurrutxaga plazara lekualdatuko da Ondartxo eta Amaia plazetan egin ohi zen asteroko kinkilleroen azoka. Ez da azoka bertan kokatuko den lehen aldia. Izan ere, plaza eraberritu aurretik bertan egoten ziren salmenta postuak. Gainera, azken urteotan bertan egin izan da azoka ekologikoa, halako jardueretarako espazio egokia izanik.
Aldaketak bi arrazoi nagusiri erantzuten die. Batetik, Ondartxo eta Amaia plazetan dauden eragozpenak saihestu nahi ditu Udalak: kamioien joan-etorrian kalteak sortzen zituen Ondartxoko garajeetan zein espaloietan, eta, gainera, azokaren orain arteko kokapenak oinezkoen zirkulazio naturala eteten zuen. Horrekin batera, zenbait tabernaren terrazen espazioak erabili behar zituzten postuak jartzeko Zenbait bizilagunen kexak kontutan hartuta, eta, espazioa aztertu ondotik, erabaki onena azoka lekualdatzea dela ikusi du Udalak.
Bigarrenik, eta egungo kezka eta arazoei erantzuna emateaz gain, kokaleku-aldaketa bat dator Eusebio Gurrutxaga eremurako garapen integraleko planarekin. Izan ere, proiektu honen barruan hainbat aldaketa izango dira plazaren bueltan: batetik, aterpe handi bat eraikiko da Torreberri eraikinaren inguruan; bestetik, Erkibe eraikinaren ingurua eta plaza lotu egingo dira; eta, azkenik, Erkibe eraikinean tokiko produktuen Elikagunea sortzea da Zumaiako Udalaren asmoa. Horiek horrela, Beheko plaza elikadurarekin eta azokekin biziberritzeko asmoa izanik, ostegunetako elikagaien eta arropen azokarentzat leku aproposa dela uste du Udalak.
Zumaiako Udalak espero du aldaketa horrek saltzaileei, erosleei, eta, oro har, herritar guztiei egingo diela mesede, eta, zumaiar oro gonbidatzen du ostegun honetako azokan parte hartzera. Postuak 08:30etik 13:00etara bitartean egongo dira bertan.
Albiste erlazionatuak
Merkataritza
Tokiko ekonomia
- 1.000 erosketa bono jaulkiko dituzte Udalak eta Gertu elkarteak, udaberriarekin batera herriko saltokiak loratzeko 2024/05/08
- Sanpedroetako artisau azokan parte hartzeko deia zumaiarrei 2024/04/18
- Utopien Herri Birak geldialdia egingo du Zumaian datorren astelehenean 2024/02/15
- 'Eskura' udal aldizkariaren azken alea webgunean ere irakurgai 2024/01/11
Zumaia bizitzeko da
- Itzurungo magalean obrak hasi ditu Zumaiako Udalak, hondartzarako sarbidearen segurtasuna hobetzeko 2024/05/14
- Zumaia, nagusiekin eta nagusiontzat 2024/05/13
- Berdintasunerako ordenantza jendaurrean erakusgai dago 2024/05/13
- Erribera kaleko zamalanen ordutegia doitu egin da ikasleen segurtasunari lehentasuna emateko 2024/05/10