Ekitaldiz eta aldarrikapenez beteta dator Martxoaren 8a

Martxoaren 8a Emakume Langilearen Nazioarteko Eguna izanik, hilabete osorako egitaraua prestatu dute Zumaiako Udalak eta herriko elkarte feministek. Martxoaren 8a plazan eman dituzte egitarauaren inguruko xehetasun guztiak. Martxoaren 8ko aldarrikapenekin bat egiteko balkoietan bandera morea jartzera gonbidatu dituzte herritarrak. Udaletxean zein Emakumeon* Etxean daude eskuragarri.

Martxoaren 8an bertan, Euskal Herriko Mugimendu Feministak abiatutako zaintza lan-lerroarekin bat egingo du Zumaiako Mugimendu Feministak, eta manifestazioa egingo du 'Denon bizitzak erdigunean' lelopean. 19:00etan hasiko da Beheko plazan, eta, irradaka dantzatuz amaituko dute ekitaldia, Martxoaren 8a plazan. Herriko eskoletan ere aldarrikapen ekitaldi eta jarduera ugari egingo dituzte goizean zehar.

Martxoaren 8ra begirako egitaraua larunbat honetan abiatuko da, ordea. Orduan inauguratuko dute Itzalpeko emakumeak erakusketa. XX. mendean errepresioa eta jazarpena jasan zituzten emakumeak dira erakusketako protagonista, eta martxoaren 4tik 26ra bitartean ikusi ahal izango da Oxford aretoan. 

Hurrengo egunean, martxoaren 5ean, Lilatoia egingo da Donostian. Aurten ere talde handia joango da bertara, 100 emakume ingurukoa. Lasterketa amaitzean elkarrekin itzuliko dira Zumaiara, eta Emakumeon* Etxean bazkalduko dute. Gaur arratsaldean banatuko dituzte dortsalak.

Horiez gain, bestelako ekitaldi ugari izango dira hilabete osoan zehar: antzezlanak, bakarrizketak, eta formakuntza saioak.

Kultur ekintza mordoa

Antolatzaileek martxoko kultur eskaintza ere feminismoz busti dute. Ostiral honetan bertan (martxoak 3) La Dramática Errante konpainiaren Yerma antzezlana izango da Aita Mari zineman. Federico García Lorcaren antzezlan bat oinarri hartuta, baina "haren hitzik erabili gabe", gaur egun seme alabarik izateko ezintasunari aurre egin behar dioten emakume guztien hitzak biltzen dituen obra da.

Martxoaren 17an (ostirala) AMAraun ikuskizuna izango da Aita Mari zineman. Amatasunaren inguruko hausnarketa bat kontatzeko musika, kantua eta dantza uztartuko dituzte.

Horiez gain, antzerkia eta bakarrizketa nahasten dituzten hiru obra izango dira Emakumeon* Etxean martxoan zehar. Lehenengoa martxoaren 7an (asteartea) izango da: Virginia Imaz pailazoak Sex o no sex antzezlana eskainiko du. Ikuskizun honetan, hilekoa, kutsadura, norbere gorputzarekin daukagun harreman konplexua, lehenengo musua, koitoa, kondoiaren negoziaketa, ginekoloarengana bisita, haurdunaldia, menopausia... bezalako gaiak aurkezten dizkigu Virginia Imazek umorea eta samurtasuna oinarri dituen klown jokoaren bitartez. Antzezlana gazteleraz izango da.

Martxoaren 9an (osteguna) Beatriz Egizabalen txanda izango da. Magma mia! bakarrizketa feminista ekarriko du Zumaiara, militantziatik asko, baina umoretik are gehiago duena. Bakarrizketa euskaraz izango da.

Martxoaren 30ean (osteguna) izango da azken bakarrizketa. Raquel Lopez eta Ane Lindanek Despotorre bakarrizketa saioa eskainiko dute. Ia ordu eta erdian komediari ikuspegi feminista gehituko diote autozentsurarik gabe, aurrean aurkitzen duten guztiari barre eta kritika eginez. Emanaldia elebiduna izango da, gehiena gaztelaniaz.

Formaziorako tartea ere bai

Martxoaren 8a edukiz janzteko, Zumaiako Emakumeon* Etxeak eta Berdintasun Sailak bi formazio saio antolatu dituzte. Lehena martxoaren 15ean (asteazkena) izango da: Sortzen aholkularitza zerbitzua 'Soilik bai da bai' legearen inguruko saioa eskainiko du, orain gutxi onartutako araudiaren inguruko argipenak emateko. Bigarren saioa martxoaren 22an (asteazkena) izango da: Eskola Feministaren barruan, Feminismo y racismo formazio saioa emango du Luciana Alfarok.

Albiste erlazionatuak