Martxa onean doa Egutera energia kooperatibaren bazkidetza kanpaina

Zumaiako Energia sorkuntza eta kontsumorako irabazi asmorik gabeko kooperatiba da Egutera. Lehen pauso gisa, hektarea bateko eguzki-panel planta bat eraikiko du kooperatibak, Oikian. Ondo bidean, hiru aste barru hasiko dituzte eguzki-parkea eraikitzeko lanak.

600 etxeren energia elektrikoaren kontsumo totala asetzeko besteko eguzki energia sortuko da bertan. Kooperatibako bazkide diren herritarrek, kapital ekarpen baten truke, euren etxeetako argindar kontsumoaren %100 estaltzeko adina energia sortuko dute Oikiako parke fotovoltaikoan. Bazkideak biltzeko kanpaina hasi zenetik, 200 herritarretik gorak hasi du bazkide egiteko prozesua; horietatik 96 bazkide dira dagoeneko.

Proiektuak Euskal Energia Erakundearen babesa duenez, eguzki-parkea eraikitzeko obrak hasteko ez da bazkide kopuru totala bildu zain egon beharko. Edonola ere, Egutera energia kooperatibak herritarrei jakinarazi nahi die arreta bulegoa uda baino lehen itxiko dela, eta interesa duten herritarrei gomendatzen die bazkide egiteko prozesua ahal bezain pronto hastea.

Halaber, beste ohar garrantzitsu baten berri ere eman dute: merkatariek eta enpresa txikietako bazkideek ordainketa epeka egiteko aukera izango dute. Horiek egin beharreko hasierako ekarpena handiagoa izanik, erraztasunak eman nahi zaizkie. Ekarpena handiagoa bada ere, Eguteraren energia sorkuntza erabat aproposa da haientzat, kasu gehienetan energia kontsumo osoa egunean zehar egiten dutelako. 

Bazkide egiteko bi modu: internet bidez eta aurrez aurre

Bi modutan hasi daiteke bazkide egiteko prozesua:

• Internet bidez, www.egutera.ekiola.eus webguneko formularioa beteta
• Aurrez aurre, Kofradiako bulegora joanda: Kofradian (Erribera kalea 20), astelehenetik ostegunera 16:00etatik 19:00etara bitartean.

Halaber, zalantzak argitzeko bi bide daude zabalik:

• Whatsapp zenbakia: 747 418 647
• E-maila: info@egutera.ekiola.eus

Inguruko herritarrentzat ateak zabalik

Bazkidetza kanpainaren lehen fasea pasata, eta, oraindik lekua egonik, inguruko herrietako herritarrek, merkatariek zein enpresa txikiek Egutera kooperatiban sartzeko aukera dute orain.

Gehienez ere 25 kilometroko erradiora arteko lekuetan bizi direnei onartuko zaie Eguteran sartzea, eta lehentasuna gertuen daudenek izango dute.

Albiste erlazionatuak