[BIDEOA] Gauza miresgarriak gertatzen dira

2020/04/02

Apirilaren 2an ospatzen den Autismoaren Kontzientziaziorako Nazioarteko Eguna dela eta, autismoari buruz informatzeko eta hezteko sortutako animazioa ikustera gonbidatu dituzte herritarrak Gautena Elkartearen eta Zumaiako Udalaren izenean.

Gaur ziren egitekoak, hasiera batean, "Autismoa ulertu nahi duzu?" izenpean prestatutako saioa; baina COVID-19 birusagatik sortutako osasun alarma egoera tarteko, saioan aurkeztu behar zuten ikus-entzunezko lana internet bidez ikusteko gonbidapena egitea erabaki dute ekimenaren antolatzaileek.
Gizartean, eta bereziki gazteen artean, bizikidetasuna eta ezberdintasunen onarpena sustatzeko helburua duen bideo laburra dugu hau, autismoaren ezaugarriak modu erraz eta ulergarri batean azaltzen dituena. “Desberdinak gara denok eta ederra da hori” dio Eneko Dorronsorok, Alex Amelines sortzaile duen testua euskarara itzuli eta bideoari ahotsa jarri dionak.

Gautena elkartea

Gautena Autismoaren Espektroko Nahastea duten pertsonen senideen elkartea da. Helburua familia horiei laguntza eta aukera egokiak eskaintza da, bizitza-kalitate ona izan dezaten inklusioaren alde lan egiten duen gizarte batean.

Otsailean autismoa duten haurren guraso taldea sortu zuten Zumaian. Autismoa duten haurren hamalau familia elkartu dira Zumaian, eta “elkartu eta batak besteari indarra emateko helburuarekin, eta beharrak aztertu eta eskaerak egiteko" sortu zuten guraso taldea.

https://www.gautena.org/eu/

 

[BIDEOA] Gauza miresgarriak gertatzen dira