Esnea eta jogurtak, baserritik eskura

2023/02/01

Mareaerrota plazaren parean Santa Klara baserriko esnekiak erosteko aukera izango dute herritarrek aurrerantzean. Zapore desberdinetako jogurt naturalak eta esne osoa eskuratu daitezke bertan, egunekoak eta pasteurizatuak.

Aurrerantzean, Santa Klara baserrian ekoitzitako esnekiak zuzenean erosi ahal izango dira Zumaian. Ardantzabideko sarreran —Mareaerrota plazaren parean— dago etxola berria, eta, esne osoa zein jogurtak eskuratu daitezke bertan. Zumaiako Udalak eta Urkome landa garapenerako elkarteak sustatu dute ekimena, eta, tokiko eta landa eremuko jarduera ekonomikoa sustatzeaz gain, herritarrei bertako eta kalitatezko produktuak gerturatzea dira helburuak. Lehiaketa publikoa egin zuten iaz, eta Santa Klara baserriak lortu zuen esleipena.

Esne litroa 1,30 euroan salduko da bertan, eta 70 zentimoan litro erdia. Gainera, etxolan bertan kristalezko botila berrerabilgarria erosi ahal izango da, 50 zentimoren truke. Jogurten kasuan ere, bi tamaina aukeratu ahal izango dira, eta, jogurt naturalaz gain, beste lau zaporeko jogurtak prestatu dituzte Santa Klarako ekoizleek.

Gaur inauguratu dute esne makina berria Iñaki Ostolaza Zumaiako alkateak, Maite Mancisidor Santa Klara baserriko abeltzainak, eta Leire Arana Urkome elkarteko lehendakariordeak. Guztiek ere ekimenak harrera ona edukitzea espero dute, eta tokiko eta landako jarduera ekonomikoa sustatuko duten bestelako proiektuen aurrekari izatea.

Esnea eta jogurtak, baserritik eskura