Esti Curielen 'Lehen zanbuila', ostegunean Oxford aretoan

Kareletik proiektuan emakumeek eta itsasoak izan duten eta duten harremanak ikertu ditu Esti Curiel sortzaileak. Etorkizunean antzelan obra bat prestatzea da Curielen asmoa, eta, horren lehen oinarriak jarri nahi izan ditu lan honekin. Horiek horrela, itsasoarekin nolabaiteko harremana izan duten Zumaiako zenbait emakume elkarrizketatu ditu (marinelen emazte eta alabak, arrandunak...), eta, hizketaldi horiek oinarri hartuta, "lehen zanbuila" erakutsiko die zumaiarrei ostegun honetan, 19:00etan Alondegiko Oxford aretoan.

"Hitzaldi bat? Ez. Antzezlan bat? Ez.", azaldu du sortzaileak. Emakume horiekin izandako elkarrizketan entzundakoak eramango ditu Oxford aretora,  eta lehen pertsonan kontatuko ditu bidaia honek bere barnean mugitu duen guztia, "olatu batek txilipurdika ibili izan balu bezala". Uretara salto egin eta zipriztintzen den guztiaz arituko da, beraz.

Esti Curielek Zumaiako Udalaren sormen bekaren barruan egin du proiektu hau. 

Ibane Astigarragaren ipuinkontaketa, urriaren 7an

Sormen bekarekin, Ibane Astigarragak Julio Beobide artista zumaiarraren inguruko ipuinkontaketa prestatu du.

Sentsibilizazio artistikoa bultzatu, ondarearen babesaren garrantzia nabarmendu eta Zumaiako haurrak zein horien gurasoak Zumaiako ondare kulturalera gerturatu nahi ditu Astigarragak. Aurreratu duenez, ipuinkotaketaren amaieran, haurrak eskultore bihurtuko ditu Astigarragak, eta beraiek aukeratutako lagunaren erretratua egingo dute. Tailer horretan parte hartzeko beharrezkoa izango da aurrez izena ematea (kulturetxea@zumaia.eus e-mailera idatzita, urriak 4 baino lehen).

Sormen bekaren deialdi berria, argitaratzear

Sormen lanak babesteko helburuarekin sortu zuen iaz Zumaiako Udalak beka hau. Askotariko kultur sorkuntza babestea da asmoa, eta artistaren imajinaziotik eratorritako edozein obra lagunduko ditu: literatura, antzerkia edo antzerki testuak, zinema eta ikus-entzunezkoak, dantza, arte plastikoak, eta bestelakoak.

Lehenengo deialdian Ibane Astigarragak eta Esti Curielek lortu zituzten beka. Bigarren deialdia laster argitaratuko dela zehaztu du Zumaiako Udalak.

Albiste erlazionatuak