Itsasargia aurkeztu du Udalak, adinekoentzako eguneko arreta zerbitzu berria

Zumaiako Udaleko Gizarte Zerbitzuen sailak urteak daramatza 65 urtetik gorako herritarrei programa eta zerbitzu desberdinak eskaintzen. Tipi-tapa jarduera fisikoa sustatzeko zerbitzua, edota oroimena lantzeko tailerra dira horietako batzuk. Aurten, zerbitzu berri bat jarriko du martxan: Itsasargia.

Dinamizatzaile baten laguntzarekin, Zumaiako adinekoek hainbat arlo landuko dituzte: autonomia, harremanak, gaitasun pertsonalak zein herria parte hartzea, besteak beste. Narriadura eta mendekotasun egoerak atzeratzeko, bakardade egoerak gainditzeko zein sozializaziorako tresnak eskuratzeko dinamikak egingo dituzte. Hogarrean elkartuko dira partaideak, astelehenetik ostiralera egunean bi orduz.

Zerbitzuaren hartzaileak ondorengoak izango dira: 65 urtetik gorko adinekoak, mendekotasun arriskua edo mendekotasun arina aitortuta dutenak; 65 urtetik gorako pertsonak, mendekotasun egoera aitortuta ez badute ere, hauskortasun, isolamendu edota bakardade egoeran daudenak; eta zailtasun egoerak dituzten adineko pertsonak (dolu prozesuak, depresio egoerak, autoestima baxua...).

> Eskuorria (PDF)

Itsasargia zerbitzuaren berri emateko, eskuorriak bidaliko dira herriko etxe guztietara. Parte hartzeko interesa dutenek Zumaiako Udaleko Gizarte Zerbitzuetan eman beharko dute izena, irailaren 20tik 27ra bitartean:

BRANKA GIZARTE ZERBITZUEN ZENTROA (Aizkorri kalea 4)

943 86 22 00 / 632442256
brankaharrera@zumaia.eus

Halaber, Udalaren izenean gogoratu dute adinekoei zuzendutako zerbitzu eta programa ugari daudela martxan herrian. Hori horrela izanik, Gizarte Zerbitzuekin harremanetan jartzeko deia egin dute.

Tipi-tapa, jarduera fisikoa sustatzeko programa

Asteazkenero goizeko 10:00etan elkartzen dira partaideak, herrian zehar eta taldean oinezko ibilaldiak egiteko. Jarduera fisikoa eginda osasuna lantzearekin batera, harremantzeko aukera ematen du espazio honek. Boluntarioek bideratzen dute taldea. Urriak hasiko da tipi-tapa jarduera, eta boluntarioek zein partaideek irailaren 20tik 27ra bitartean eman beharko dute izena.

Oroimena lantzeko tailerra

Astelehen arratsaldetan eskaintzen da Hogarrean. Dinamizatzaile baten laguntzarekin, adineko herritarrek oroimena lantzeko ariketa desberdinak egiten dituzte, bai taldean, bai bakarka. Gainera, harremanak eta lagun giroa indartzen dituzte saioetan. Azken urte eta erdian 55 pertsonak parte hartu dute tailerretan. Urrian bi talde osatuko dira, eta izen-ematea zabalik egongo da irailaren 20tik 27ra bitartean.

Nagusien Mahaia

Zumaiako herritarren talde zabala eta anitza da 65 urtetik gorakoena. Batzuek autonomia handia dute, beste batzuk hauskortasun egoeran daude, eta beste hainbatek mendekotasun egoera desberdinak dituzte. Zumaiako Udalak herriko nagusiekin batera nagusien alde lan egin nahi du, eta gune desberdinak jarri nahi ditu martxan, horien nahiak, desioak, egoerak zein gogoetak jaso eta aztertzeko.

Adinekoen parte hartzea ezinbestekoa izanik, 2010etik martxan dago Zumaiako Nagusien Mahaia. Parte hartu nahi duenak, gizartelangilea@zumaia.eus helbidera idatzi beharko dute.

Albiste erlazionatuak