Macarbox enpresak lantegi berria zabalduko du Zumaian

2021/03/24
INZU taldearen arabera “inbertsio eta lanpostuetan apustu sendoa” egingo dute lantegi berriarekin. Urte amaierarako fabrika martxan egotea aurreikusten dute.

Egurko izandako pabilioian -Basusta Bidean- planta berria zabalduko du INZU taldeko Macarbox enpresak. Kartoia ekoizteko makinak egingo dituzte bertan, eta enpresako ordezkarien arabera, “taldeak apustu sendoa egingo du lantegi berrian, bai inbertsioei zein lanpostuei dagokionez”. Lanpostu gehienak makina-erreminta arlokoak izango dira, eta administrazio arloko lanpostuak ere sortuko dira. Urte amaierarako lantegi berria martxan egotea aurreikusten dute enpresako arduradunek.

Macarbox enpresak Egurko izandako pabiloian irekiko du fabrika berria

Iñaki Ostolaza alkatea eta INZU taldeko ordezkariak harremanetan izan dira azken hilabeteotan. Enpresa taldeak Egurko izandakoaren pabilioiaren jabeekin akordioa itxi ondoren bildu dira bi aldeak, eta Udalaren izenean enpresari ongi etorria emateaz gain, Macarboxeko ordezkariek Zumaiako planta berrirako dituzten asmoak azaldu zizkioten Ostolazari.

Ostolazaren esanetan, Udal Gobernuarentzat apustu garrantzitsua da Zumaiako ehun industriala indartsu mantentzea. Bide horretan kokatu du duela hilabete Xey industrigunea biziberritzeko SPRILUR sozietatearkin sinatutako akordioa, eta bide berean Macarboxek Zumaian planta berria zabaltzea albiste oso pozgarria dela adierazi du.