Udaleku irekietako begirale eta koordinatzaile postuetara aurkezteko epea bihar zabalduko da

Udan egin ohi diren udaleku irekietarako koordinatzaile eta begirale postuetarako oinarriak eta deialdia argitaratu berri ditu Udalak. Postu bakoitzerako zerrenda bat osatuko da, eta bi postuetarako hautagai izan nahi duenek bi zerrendetan eman beharko dute izena.

Udaleku irekien helburua da 3-12 bitarteko haurrentzat gozamen espazio ludikoa eskaini eta horiekin balioak lantzea, hala nola, euskararen sustapena, autonomia pertsonala, berdintasuna edota elkarbizitza.

Izen emateko epea bihar (martxoak 2) zabalduko da, eta martxoaren 30era arte egongo da zabalik. Eskaera udaletxean bertan zein telematikoki egin ahal izango dute hautagai izan nahi dutenek.

Lan eskaintzen inguruko informazio guztia:
>> BEGIRALEAK
>> KOORDINATZAILEAK

Oinarriak, baldintzak eta aurkeztu beharreko dokumentazioa

Prozesuan parte hartu eta begirale edo koordinatzaile lanak burutu ahal izateko honako baldintzak bete beharko dituzte, besteak beste:

• 18 urte beteta izatea

• Derrigorrezko Bigarren Hezkuntza tituluaren jabe izatea

• Funtzioak behar bezala betetzea eragotzi dezakeen gaixotasunik nahiz muga fisiko edo psikikorik ez izatea

• Denbora libreko begirale titulua izatea (koordinatzaileen kasuan soilik)

• Euskaraz ulertu eta ondo hitz egitea

• Izaera sexualeko delituengatiko aurrekari penalik ez izatea

Merezimenduak baloratuak izateko, ezinbestekoa izango da hautagaiek, eskaera orrian (I. eranskina), lehiaketan kontuan hartzea nahi dituzten merezimenduak idatziz jasotzea. Eskaera orrian jasota ez dauden merezimenduak ez dira baloratuko.

Eskaeran aipatzen dituzten merezimenduak egiaztatzen dituzten agirien kopiak, aldiz, Udalak dokumentu horiek bere esku ez dituen kasuetan bakarrik aurkeztu beharko dituzte hautagaiek. Hau da, hautagaiek berriak diren agiri edo tituluak bakarrik aurkeztu beharko dituzte, aurrez Udalean aurkeztu ez direnak.

Lan eskaintzen inguruko informazio guztia:
>> BEGIRALEAK
>> KOORDINATZAILEAK