Musikak hartuko du Zumaia uztailaren 30etik abuztuaren 11ra

Jaialdian parte hartuko duten musika taldeetako kideek, kultura zinegotzia eta kultura teknikariarekin batera aurkeztu zuten atzo Zumaiako 35. Musika Jaialdiko egitaraua. Musika klasikoa du ardatz jaialdiak, baina beste estilo eta espresio batzuk ere bere lekua izango dute.

Bi ekitaldi berezi

Egitarau zabala antolatu da aurtengoan ere, eta horretan herriko talde eta musikariek presentzia handia izango dute.

Abuztuaren 1ean, ostegunean, San Pedro Abesbatzak Doinu zahar, kantu berri ikuskizuna eskainiko du Aitzuri frontoian. Trio Zukan hirukotea eta Amets Arzallus bertsolariarekin batera hartuko dute oholtza. Bertsoa eta euskara oinarrian dituen ekitaldia izango da.

Abuztuaren 4ean, Sapere Aude Sinfoniettak hartuko du Zumaiena ikastetxeko areto nagusia. Aurtengoan ere, Fernando Velázquezen zuzendaritzapean Mendelssohnen 1. biolin kontzertua eta Mozarten 35. sinfonia 'Haffner' joko du orkestrak. Georgy Vasilenko biolin jotzailea izango dute lagun ekitaldian. 22.00etan izango da kontzertua.

San Pedro abesbatzaren kontzertua eta Sapere Aude Sinfoniettarena ikusteko sarrerak salgai daude turismo bulegoan, 10 euroan. Egunean bertan 12 euroan izango dira salgai. Herriko musikariek nabarmendu dute aurten haurren sarreretan azpimarra egin nahi dutela, halako ekitaldietan haur eta gaztetxoen presentzia handitu asmoz (sarrerek 4 euro balio dute haurren eta Gazte Txartela duten gazteen kasuan).

Egitarau anitz eta zabala

Zumaiako musikariek egingo dituzten ikuskizunez gain, aurtengoan ere eskaintza zabala izango du Musika Jaialdiak. Madama Butterfly opera proiekzioa, Ganuxi laukotearen klarinete kontzertua, zinea eta musika nahasten duen ekitaldia Javier Perez de Azpeitia piano jotzailearekin, Enssemble 442ren kontzertua Donostiako Musika Hamabostaldiaren baitan, Alboka folk taldearen kontzertua, dantza ikuskizunak, haurrentzako tailerrak eta ipuin kontaketa edota musika inprobisatua ardatz duen Trizak proiektuaren ikuskizuna.

Musika eta kulturaren balioa

Jaialdiaren historian denetarik izan dela nabarmen du Marina Bidasoro kultura zinegotziak prentsaurrekoan eta aurtengo programarekin “pozik” agertu da. “Musikarekin Zumaiako areto eta txokoak beteko ditugu, eta zumaiarrak parte hartzera gonbidatu nahi ditugu”. Era berean, “kultura eta sorkuntza balioetsi eta aitortu, eta honakoaz gozatzeko bide berriak sortzeko gogoa eta konpromisoa” agertu du.

Antolatzaile eta aholkulariei eskerrak

Zumaiako Udalak eskerrak eman dizkio Musika Jaialdia antolatzeko lanean aritu diren talde eta norbanako guztiei. Agerraldian egondako musikariek, musikari moduan ez ezik, aholkulari eta gidari lanak bete dituztela nabarmendu dute Udaletik, eta horrek duen balioa azpimarratu.

Informazio gehigarria:

Kartela

Ekitaldi bakoitzaren inguruko zehaztapenak

 Baleikeren albistea

Albiste erlazionatuak