Zumaiako Herri Eskolako Aita Mari eraikineko lehen solairua eraberritzeko lanak martxan

Hasi dituzte Aita Mari eraikina eraberritzeko lanak. Eraberritze-proiektuaren ardatza eraikinaren lehen solairua izango da, gaur egun Lehen Hezkuntzako lehen zikloa dagoen tokia; eremu hori egungo diseinu-kanonetara egokituko da, heziketa-eremu atseginagoa sortzeko. 

Barne-antolaketari dagokionez, bere horretan mantenduko da orain arteko 4-4 ikasgelen eskema: egun eraikinaren hegoaldean 3-4 urteko haurrentzako lau gela daude, eta iparraldean 4-5 urteko haurrentzako beste lau. Ikasgela bakoitzak ikasgai espezifiko bat barnebiltzen du: matematika eta zenbakiak, zientziak eta natura, espazio artistikoa eta hizkuntzak. Antolaketa horri esker, haurrak espazioan mugitzen dira, esplorazioa eta zirkulazio askea sustatuz, eta horrek ikaskuntza aktiboagoa eta integratuagoa egiten laguntzen du. Eraberritzearekin, espazio malguagoa eta funtzionalagoa izango da.

Ikus planoa

Gainera, eraikinaren isolamentu termikoa zein akustikoa hobetzeko, eta, energia eraginkortasuna handitzeko, fatxada osoa estradosatuko da; instalazio elektrikoa ere erabat aldatuko da, eraikinaren energia-kontsumoa murrizteko.

Diseinu berri hau Herri Eskolako zuzendaritzarekin eta Guraso Elkartearekin elkarlanean garatu da. Horiek horrela, Udala eta hezkuntza-komunitatea eskuz esku aritu dira ikasleen beharrei erantzungo dien heziketa-eremu egokitua sortzeko. Zumaiako Udalak 591.264 euro erabiliko ditu obra egiteko, eta, ondo bidean, irailaren amaierarako prest egongo da guztia.

Zumaiako Udalak eta Jaurlaritzako Hezkuntza Sailak akordioa izenpetu zuten 2021 amaieran, Herri Eskolako Aita Mari eraikinean haurreskola berria kokatu, eta sukalde eta jantoki berriak egiteko. Bi aldeak, hezkuntza komunitatearekin batera, espazioen banaketaren inguruko lanketa egiten aritu dira ordutik. Zumaiako Udalak dagoeneko prest dauka hitzarmenaren zirriborroa, eta aste honetan bertan igorriko du Eusko Jaurlaritzara. Honakoak onartuko balu, hurrengo pausoa proiektua lizitazioa izango litzake; ondoren etorriko litzake obra.

Azken urteotan bestelako hobekuntzak ere egin ditu Udalak hezkuntza publikoaren azpiegituretan: Aita Mari eraikineko jolastoki berriak eta bi sarrera nagusien hiritartzeak dira horietako batzuk. Gainera, Eusko Jaurlaritzako Hezkuntza Sailarekin elkarlanean beste bi lan garrantzitsu garatu dira: Herri Eskolaren Sagarbide esparruan erabilera anitzetarako aterpea eraiki da, eta, dagoeneko oso aurreratuta daude DBHko eraikin berriaren lanak.

Lan horiek guztiak ildo estrategiko bati erantzuten diote: Zumaian 0 urtetik 18 urtera arteko kalitatezko hezkuntza publikoa bermatzeko azpiegiturak egokitzen ari dira espazio berean, Aita Mari-Sagarbide espazioan, alegia. 

Albiste erlazionatuak