Ludotekako jostailu erakusketa birtuala izango da aurten

Bizi dugun osasun egoerak ez du ahalbidetzen ohiko jostailu erakusketa egitea, eta aurtengoan modu birtualean egingo dute urteroko jostailu erakusketa. Ludotekako hezitzaileek 6 urtetik aurrerako haurrentzat egokiak diren jolas aukeraketa bat egin dute, eta hori ikusgai izango duzue online katalogoan.

Aurten, jostailuak etxera eraman ahal izango dira, familian jolasteko aukera eskainiz. Era horretan, jolas berriak probatu eta ezagutzeko aukera izango dute haurrek eta gurasoek.

Hezitzaileek Ludotekan dauden jostailu eta jolasetako batzuk aukeratu dituzte. Azaldu dutenez “haurrek Ludotekan dauden bestelako jostailu eta jolasen inguruko esperientzia badute”, eta beraz, gurasoak zalantza eta kontsultak egitera gonbidatu dituzte. Horretarako, Ludotekako telefonoa edo e-posta erabili dezakete (943143264 / ludoteka@zumaia.eus).

Ikusi online katalogoa:

Deskargatu jostailu eta jolasen online katalogoa (PDF)

Nola egin eskaera?

Jostailu edo jolasetako bat maileguan eraman ahal izateko, fitxa bat bete beharko da datu pertsonalekin eta, gehienez ere, aste betez eduki ahal izango dute etxean. Ludotekako bazkideek ez dute fitxa bete beharko.

Jostailu guztiak azaroaren 30etik aurrera egongo dira eskuragarri, eta astelehenetik ostiralera 17:00etatik 19:00etara bitartean jaso ahal izango dira, Ludotekan bertan.

Erreserba garaiz egitea eskatu dute, antolaketa errazteaz gain, materiala prest izatea ahalbidetuko baitu. Halaber, hezitzaileek nabarmendu dute beharrezko neurriak hartuko dituztela jostailuak jaso eta beste inori utzi aurretik.

Albiste erlazionatuak