Amaia Iturriotz, Urt Zubiaurre eta Angel Gallo izan dira 33. Julene Azpeitia ipuin lehiaketako saridunak

Azaroaren hasieran bildu zen epaimahaia lehiaketa erabakitzeko. Bertan izan ziren Ana Urkiza, Castillo Suarez eta Josu Waliño; Udaleko euskara teknikariak idazkari lanak egin zituen, botorik gabe. Aurten 60 lan aurkeztu dira, inoizkorik gehien, horietatik 6 zumaiarrek idatzitakoak.

Euskal Herri guztitik aurkeztu diren lanean artean, onenak honako hauek direla erabaki dute epaimahaia osatu duten idazleek:

1. saria, 3.000 eurokoa, Amaia Iturriotz Etxanizek eskuratu du IBAIAK GAINEZ ipuinari esker. Amaiak lehenengo aldiz irabazi du lehiaketa hau. Epaimahaiaren iritziz lanik onena izan da oso ondo idatzia dagoelako, estilo finean landua. Oso iradokitzailea da, atmosferikoa, irakurleari sentsazio asko transmititzen dizkio.

2. saria, 1.500 eurokoa, Urt Zubiaurre Otamendik irabazi du GANBARA lanarekin. Ipuin honek hizkuntza oso ondo landua du eta bikaina da egitura aldetik. Gaia ez da berria, baina oso estilo jantzian kontatua dago eta idazkuntzak garrantzia handia du ipuinean.

Zumaiako onenaren saria, berriz, Angel Gallo Fernandezentzat izan da 20 URTE ETA GERO ipuinagatik. Ipuin honek tentsioa mantentzen du, egitura berezia du, dokumentalaren itxurakoa, oso gordin jasotzen dira hitzak eta sentimenduak, eta egituraren originaltasuna ere azpimarratzekoa da.

Sari banaketa ekitaldia Euskararen egunean egingo da, abenduaren 3an, ostegunean, 19:00etan, Aita Mari zinema aretoan. Ondoren Kamikaz kolektiboak eta Ttak! Konpainiak sortutako “Agur eta dolore” antzezlan laburra eskainiko da. Amancay Gaztañagak zuzendutako obra da, eta Iraia Elias eta Miren Gaztañaga ariko dira aktore lanetan. Bertaratzeko aurrez turismo bulegoan hartu beharko da gonbidapena. 

Albiste erlazionatuak