Banatu dira Julene Azpeitia ipuin lehiaketako 33. edizioko sariak

Atzo arratsean banatu zituzten aurtengo Julene Azpeitia Sariak, Euskararen Egunean eta Euskaraldiaren baitan. Aurtengoan, Amaia Iturriotz, Urt Zubiaurre eta Angel Gallo  izan dira saridunak, eta dagoeneko irakurgai daude ipuinak webgune honetako Julene Azpeitia atalean.

Maddi Aldalur Euskara eta Hezkuntza zinegotziak, Ainhoa Illarramendi Euskara batzordekideak  eta Iñaki Ostolaza alkateak eman zizkieten sariak. Iñaki Ostolaza alkateak esker ona adierazi zien sarituei eta lehiaketako parte hartzaileei, eta herritarrak idazten eta irakurtzen jarraitzera gonbidatu zituen. Sari banaketa eta gero 'Agur eta dolore' antzezlana ikusteko aukera izan zuten zumaiarrek.

Aurten 74 lan aurkeztu dira, inoizkorik gehien, horietatik 6 zumaiarrek idatzitakoak. Azaroaren hasieran bildu zen epaimahaia lehiaketa erabakitzeko. Bertan izan ziren Ana Urkiza, Castillo Suarez eta Josu Waliño; Udaleko euskara teknikariak idazkari lanak egin zituen, botorik gabe. 

Ipuinak irakurgarri, paperean eta sarean

Julene Azpeitia lehiaketaren 25. urteurrenaren harira, lehiaketako edizio guztietan saritutako ipuinak digitalizatu ziren lehen aldiz. Orduz geroztik, sorreratik hona saritutako ipuinak modu digitalean eskuragarri daude web honetan bertan (epub, mobe eta PDF formatuan). Aurtengo sarituen ipuinak ere irakurgai daude bertan.

Ondorengo loturetan irakurri daitezke saritutako ipuinak:

• Ibaia gainez. Amaia Iturriotz Etxaniz (Lehen saria) 
• Ganbara. Urt Zubiaurre Otamendi (Bigarren saria)
• 20 urte eta gero. Angel Gallo Fernandez (Zumaiako onenaren saria) 

Gainera, urtero bezala, aurtengoan ere paperean irakurri ahal izango dira. Alondegian eta udaletxean liburuxkak jarri dituzte eskuragarri.

Julene Azpeitia ipuin-lehiaketa atala: 33 urte, 92 ipuin

Albiste erlazionatuak