Eskubaloi pista berritzeko lanak martxan daude

Dagoeneko martxan daude Zumaiako kiroldegiko eskubaloi pista berria eraikitzeko lanak. Udalak Pulpo eskubaloi elkartearekin batera zehaztu ditu pistaren ezaugarriak. Haien eskariz, pista berriak Munduko Eskubaloi Txapelketan erabilitako pistaren material eta ezaugarri berak izango ditu.

Zumaiako kiroldegiko eskubaloi kantxa -2,75 m-ko kotan dago, aireztatutako forjatu sanitarioaren gainean. Orain artean, hainbat mantentze-lan eta konponketa egin dira bertan, baina urtetako erabileraren ondorioz sortutako kalteta tarteko, eta hezetasunak eta kondentsazio-arazoak saihesteko, pista guztiz berrituko du Udalak. Zoladura binilikoa eraiki aurretik, euskarria isolatu egingo da.

Hori horrela, ekainean zehar, gaur egungo zoladura kendu, isolamendu lanak egin, eta 6cm gehiagoko altuera emateko lanak egingo dituzte. Ondoren, uztailean, zoladura berria jarriko dute: PVC materialeko zoladura lehenengo, eta xafla iragazgaitza gero. Bestelako lanak amaitu ondotik, uztailaren amaieran pistak markatuko dituzte. Zumaiako Udalak 185.608 euro erabiliko ditu pista berritzeko. 

Kiroldegiko berrikuntzetan lehenengoa

Eskubaloi pistaren berrikuntza da kiroldegian egingo diren eraberritze lanen artean lehena. Honen atzetik etorriko dira bigarren igerilekuaren eraikuntza, eta barne antolaketaren eraberritzea, besteak beste. Ezagutu hemen kiroldegia berritzeko eta bigarren igerilekua eraikitzeko proposamena).

Hasiera batean pista 2022an eraikitzea zen asmoa, baina kiroldegian bestelako lanak egitea aurreikusita zegoenez, aurreproiektua osatuta eta definituta egon arte ez dira pista eraikitzeko lanak onartu. Behin pista berriaren ezaugarriak onartuta, 2023rako aurrekontuetan txertatu zen beharrezko partida, eta orain hasi dira lanak. Ondo bidean, abuztuaren hasieran erabilgarri egongo da kantxa berria.

Albiste erlazionatuak