Itzurunbideko igogailuaren inguruko irisgarritasuna hobetzeko lan osagarriak egingo ditu Udalak

Itzurunbideko igogailua egiteko lanak azken txanpan daude. Atzo jarri zen igogailuaren plataforma, eta datozen egunetan hormigonatze lanak egingo dituzte beharginek. Udalak herritarren mugikortasuna eta auzoko irisgarritasuna hobetzea du helburu, eta igogailu berriak hiru geldiune izango ditu: Itzurunbidea, erdialdeko belargunea eta Larretxoko goialdeko pasabidea. 

Igogailuaren obra amaitzear dagoen honetan, Zumaiako Udalak inguruko oinezkoen pasabideak hobetzeko erabakia hartu du. Larretxoko bidegurutzean bi zebrabide falta dira, eta hainbat puntutan espaloiak bi metro baino estuagoak dira —egun ez dira irisgarritasun baldintza minimoak betetzen—. Bidegurutzean dauden aparkalekuek, gainera, oztopoak sortzen dituzte. Egoera honek zailtasunak eragiten dizkie oinezkoei; ez soilik gurpil-aulkian doazenei, baita edozein oinezkoari eta, kasu larrietan, anbulantzien kamillen garraioari ere—.

Eraldaketa berriarekin, inguruko etxebizitzetatik igogailura modu seguru, eroso eta irisgarrian iritsi ahal izango dira bizilagunak. Udalak azaldu duenez, behar-beharrezkoak diren aparkalekuak bakarrik kenduko dira horretarako, irisgarritasuna bermatzeko neurri horiek ezinbestekoak baitira. Neurri hau hainbat bizilagunek egindako eskaerei erantzunez gauzatuko da, eta Udalak Irisgarritasun Planean jasotakoarekin bat dator.

Larretxoko bidegurutzean egingo du eskuhartzea Zumaiako Udalak

Zumaiako Udalak gogorarazi du proiektu hau ez dela bakarrik azpiegitura berri baten eraikuntza, baizik eta auzoko irisgarritasuna eta bizi-kalitatea hobetzeko urrats garrantzitsua. Igogailua urtea amaitu baino lehen egongo da martxan, eta ordurako Larretxoko bidegurutzean egin beharrekoak ere amaituta egongo dira.

Albiste erlazionatuak