Zumaiako Udalaren agendak badu aterpe berria: 'Estalapea'

2020/05/02

COVID-19ak sortutako egoeraren aurrean, Zumaiako Udalak espazio berri bat ireki dio kultur eskaintzari eta agendari: “Estalapea”. Dagoeneko ikusgai jarri dute Distira Argazki Elkarteak prestatutako bideoa, eta gaur bertan, 'Queen' dantza ikuskizuna estreinatuko du Astindu Dantza Elkarteak. Bideo guztiak labur.eus/estalapea helbidean bilduko dituzte.

COVID-19a dela-eta ezarritako alarma egoerak eta etxean egoteko aginduak Zumaiako agenda eta kultur programazioaren birplanteamendua ekarri du. Egoerari erantzunez, espazio berri bat sortu du Zumaiako Udalak: “Estalapea”.

Egoera honek irauten duen bitartean, sortzaileek, hizlariek eta hainbat eragile eta elkartek Estalapea hartuko dute. Dantza emanaldiekin eta argazkilaritzarekin abiatuko dute egitasmoa, baina datozen asteotan tailerrak, erakusketak, haurrei zuzendutako bideoak edota hitzaldiak ere izango dira Estalapean, besteak beste.

Hona hemen dagoeneko Estalapean bildu dituzten bideoak:

Maiatza Dantzan, Astinduren eskutik

Aurreko urteetan egindako emanaldiak online ikusteko aukera izango da maiatzean zehar Estalapean. Tailerrak ere internet bidez jarraitzeko aukera izango dute herritarrek.
Egitasmoa "Queen" dantza ikuskizunarekin estreinatuko dute. Gaur bertan, arratsaldeko 18:00etatik aurrera ikusi ahal izango da Estalapean.

Zumaia argazkitan, Distiraren eskutik

Hegoak berriro zabaltzeko aukera izan bitartean, Zumaiako bazter ederrenetan barneratzeko bidea eskaintzen digu Distira Argazki Elkarteak. Lan honek Zumaiako turismo bulegoaren deialdian du iturria. Elkartekideenak dira argazkiak, kantuan Beheko Plaza abesbatza, eta muntaia Zumbaissen lana da.

Gune honetan bilduko dituzte emanaldi guztiak: https://labur.eus/estalapea

Herritarren topaleku, kulturaren aterpe

Estalapea arrantzaleen babes-leku izan da urte luzez, eta ordutik, jarduera, jolas eta kultur-ekitaldi ugariren lekuko izan da Kofradiako aterpea. Zumaiarrontzat hain berezia den tokia sarera eraman du Udalak, jarduera guzti horiei aterpe eman, eta herritar, sortzaile eta eragileentzat topagune bat sortzeko.

Zumaia herri bizia da, eta momentu zail hauetan ere, kulturak, hezkuntzak, berdintasunak... herrian duen lekuari eutsi nahi dio Udalak egitasmo honen bidez, etxean gauden bitartean ere, Zumaia bizirik egon dadin”. Egitasmoaren sustatzaileen arabera, elkarlana eta kultura “Zumaiaren zutabe garrantzitsuak” dira, eta egoeran zailenetan ere, kultur eskaintza zabala eta oparoa eskaini nahi diete zumaiarrei.