ZumaianBai.eus herriko negozioen erakusleiho birtuala, sare sozialetan ere bai

Pandemia ondorengo egoeran sortu zuten Zumaiako Udalak eta Gertu elkartean ZumaianBai.eus webgunea, Dendartean Gipuzkoako Merkatari eta Ostalarien elkartearekin lankidetzan, tokiko jarduera ekonomikoak lagundu eta indartzeko helburuarekin. Azken urtean 250 saltoki ingururen informazioa pilatu dute webgunean, eta zuzenean erosi daitezkeen 2.000 produktu baino gehiago daude bertan jasota. Gainera, saltokien informazioa kontsultatzeko zein WhatsApp bidez eskaerak egiteko aukera ematen du plataformak.

Finean, webgune honetan herriko komertzio, taberna eta zerbitzu enpresa txikien inguruko informazioa dago bilduta: enpresen gida, argazkiak, produktuak, saltokiarekin harremanetan jartzeko beharrezko inforamzioa, edota online erosteko aukera biltzen ditu, besteak beste. 

>> Instagram-eko kontua

>> Facebook-eko orria

Orain, plataformaren erabiltzaile kopurua handitzeko helburuarekin, komunikazio kanpaina bati ekin diote. Xabier Aldalur Dendartean elkarteko teknikariak eman ditu xehetasunak. Instagram eta Facebook sare sozialetan profilak zabaldu dituzte, eta, kontu horiek jarraituta, herriko saltokien produktuak, merkataritzarekin loturiko albisteak, kanpainak eta intereseko beste hainbat kontu aurkitu ahal izango dituzte zumaiarrek. Gainera, sare sozial horiek bidez zozketak egingo dituzte. Horrenbestez, sare sozialak dituzten zumaiarrak ZumaianBai.eus webgunea erabili eta sareetako bere kontuak jarraitzera animatzen dituzte.

Alex Oliden tokiko garapeneko zinegotziaren arabera, pandemia garaiak indartu egin zuen lehendik ere herriko merkatariekin zegoen elkarlanerako ohitura eta tradizioa. Pandemia egoeran hartutako neurriak eta egindako ErrotaHerria kanpainari jarraipena eman beharra zegoela uste zuten bi aldeek, eta horregatik sortu zuten online plataforma. Azken urtean webgunean informazio ugari pilatu dute, eta herriko merkatariek formakuntza jasotzeko aukera izan dute. Orain, salto honekin, erakuslehio birtuala kanpora begira indartu nahi dute nabarmendu du Olidenek.

>> zumaianbai.eus

Informazio eguneraketa

Komunikazio kanpainaren hasiera baliatuz, plataformako informazioa eguneratuko dute. Horretarako, webgunean ageri diren saltoki guztiei email bidez euren datuak eguneratzeko zein argazkiak aldatzeko aukera emango zaie. Horiek info@zumaianbai.eus helbidera bidali beharko dituzte eguneraketak. 

Era berean, une honetan webgunean parte hartzen ez duten merkataritza, ostalaritza eta zerbitzu enpresek aukera dute bat egiteko. Horretarako, 638004576 telefonora deitu beharko dute. Webgune honi esker Zumaiako saltokiek beren negozioak interneten ikusgai jarri ditzakete: negozio bakoitzak fitxa bana dauka webgunean, eta bertan, oinarrizko datuez gain, harremanetan jartzeko datuak jasotzen dira.

Zehaztutako bide horiez gain, herriko negozioetako arduradunek ohiko bideak erabili ditzakete harremanetan jartzeko.

Albiste erlazionatuak