0-6 urte bitarteko haurren gurasoei zuzendutako bizipen tailerretarako izen-ematea zabalik, urriaren 18ra arte

Bizipen tailerrean guraso moduan hobeto sentitzeko, hoberena dena egiteko, soluzioak bilatzeko, hausnartzeko, partekatzeko... aukera izango dute gurasoek. Horretarako, gai askori helduko diote tailerretan: amorrua, mugak, teknologia, autokontrola, eskola eta sozializazioa, besteak beste.

Aurten, hiru saioko programa izango da, eta astelehenetan izango dira saioak (urriaren 23an, azaroaren 20an eta abenduaren 11n), 17:00etatik 19:30era. Bi erreferente dauden kasuetan, biek parte hartzea gomendatzen dute antolatzaileek. 

Dinamizatzaileak aurreko urteetako berdinak izango dira, Jon Urdineta eta Itziar Rosado psikomotrizistak. Bizipen tailerrak euskaraz eskainiko dira, baina eskatzaileen beharren arabera gaztelerazko bigarren talde bat osatzea aztertuko dute Gizarte Zerbitzuetako arduradunek. Horrenbestez, interesa duen oro Gizarte Zerbitzuekin harremanetan jartzera gonbidatu dituzte.

Izen-ematea

Bizipen tailerrean parte hartu nahi duten gurasoek urriaren 18a baino lehen eman beharko dute izena, herriko ikastetxeek e-posta bidez zehaztutako moduan edo Gizarte Zerbitzuetan zuzenean (Branka Gizarte Zerbitzuen bulegoetara joanda, brankaharrera@zumaia.eus e-mailera idatzita, edo 943 86 22 00 telefono zenbakira deituta.

Matrikulak 20 euro balio ditu pertsonako, eta honako kontu korronteak sartu beharko da dirua: KUTXABANK ES28 2095 5174 90 1060024873. Izen-ematea egiterako momentuan aurkeztu beharko da ordainagiria.

Guraso eskolak, bidelaguntza eskaini eta sare berriak sortzeko

Gurasoak heziketa prozesuan inplikatzea eta horretarako bidelaguntza eskaintzea, eta gurasoen arteko sare berriak sortzea dira Zumaiako Guraso Eskolaren helburuak. Udaleko Gizarte Zerbitzuek, Hezkuntza eta Gazteria sailek, eta herriko hezkuntza komunitateak elkarlanean antolatutako programa da, eta 0 eta 18 urte bitarteko haur eta gazteen gurasoei zuzenduta dago. Hala, hiru talde desberdinetan banatuta, adin-tarte bakoitzaren ezaugarrietara egokitutako formakuntza jasotzeko aukera izaten dute Zumaiako gurasoek.

Programa antolatzeko Zumaiako Udalak Eusko Jaurlaritzaren eta Gipuzkoako Foru Aldundiaren laguntza dauka, eta hitzaldietako batzuk Treba Gurasoak programaren baitan kokatzen dira.

Albiste erlazionatuak