Guraso eta seme-alaben arteko komunikazioa hobetzeko gakoak landuko dituzte hilaren 19an

Gurasoak heziketa prozesuan inplikatzea eta horretarako bidelaguntza eskaintzea, eta gurasoen arteko sare berriak sortzea dira Zumaiako Guraso Eskolaren helburuak. Udaleko Gizarte Zerbitzuek, eta Hezkuntza eta Gazteria sailek elkarlanean antolatutako programa da, eta 0 eta 18 urte bitarteko haur eta gazteen gurasoei zuzenduta dago. Hala, hiru talde desberdinetan banatuta, adin-tarte bakoitzaren ezaugarrietara egokitutako formakuntza jasotzeko aukera izaten dute Zumaiako gurasoek. Programa antolatzeko Zumaiako Udalak Eusko Jaurlaritzaren eta Gipuzkoako Foru Aldundiaren laguntza dauka, eta hitzaldietako batzuk Treba Gurasoak programaren baitan kokatzen dira.

Pornografia eta sexu-heziketari buruzko hitzaldiarekin hasi zen aurtengo zikloa, eta lagun artean harreman osasungarriak eraikitzeko gakoak izan zituzten hizpide bigarren saioan. Orain, hirugarren saioan, guraso eta seme-alaben arteko komunikazioa hobetzeko irizpideak eskainiko ditu Leyre Cano psikopedagogoak. Parte hartzeko aurrez izena eman beharko da, martxoaren 17a baino lehen, brankaharrera@zumaia.eus e-mailera idatzita.

Apirilean, ikasturteko azken hitzaldia

Apirilaren 23an amaituko da aurtengo ikasturteko Guraso Eskolen eskaintza. Estibaliz Ansotegi izango dugu gurean, nerabeen buru-osasunaz aritzeko. Saio honetan parte hartzeko izen ematea apirilaren 1ean zabalduko dute.

Bizipen tailerrak

Honakoak ez dira ikasturtean egin diren lehenengo Guraso Eskolak. 2023ko azken hiruhilekoan 0-6 urte bitarteko haurren gurasoek bizipen tailerretan parte hartu dute, Jon Urdineta eta Itziar Rosado psikomotrizistak gidari zituztela. Orain, 6-18 urte bitarteko haur eta nerabeen gurasoen txanda izango da, eta, apirila bitarte, lau hitzaldi horietan parte hartzeko aukera izango dute. 

Albiste erlazionatuak