Pornografia eta sexu-heziketari buruzko hitzaldiarekin hasiko dira Guraso Eskolak, urtarrilaren 30ean

Gurasoak heziketa prozesuan inplikatzea eta horretarako bidelaguntza eskaintzea, eta gurasoen arteko sare berriak sortzea dira Zumaiako Guraso Eskolaren helburuak. Udaleko Gizarte Zerbitzuek, eta Hezkuntza eta Gazteria sailek elkarlanean antolatutako programa da, eta 0 eta 18 urte bitarteko haur eta gazteen gurasoei zuzenduta dago. Hala, hiru talde desberdinetan banatuta, adin-tarte bakoitzaren ezaugarrietara egokitutako formakuntza jasotzeko aukera izaten dute Zumaiako gurasoek. Programa antolatzeko Zumaiako Udalak Eusko Jaurlaritzaren eta Gipuzkoako Foru Aldundiaren laguntza dauka, eta hitzaldietako batzuk Treba Gurasoak programaren baitan kokatzen dira.

Apirila bitarte, lau hitzaldi

Iragarri duten programaren barruko lehenengo saioa urtarrilaren 30ean izango da, eta sexu-heziketa eta pornografiaz ariko da Eider Goiburu psikologoa (hitzaldia 12 eta 17 urte bitarteko nerabeen gurasoei zuzenduta dago bereziki); otsailaren 27an lagun arteko harreman osasuntsuen inguruko saioa eskainiko du Nerea Mendizabalek; martxoaren 19an "Komunikazioa familian" hitzaldia emango du Leyre Canok; eta, programarekin amaitzeko, apirilaren 23an nerabeen osasun mentalaz ariko da Estibaliz Ansotegi. Hitzaldietara joateko aurrez izena eman beharko da, kartelean zehaztutako epean, brankaharrera@zumaia.eus e-mailera idatzita.

Bizipen tailerrak

Honakoak ez dira ikasturtean egin diren lehenengo Guraso Eskolak. 2023ko azken hiruhilekoan 0-6 urte bitarteko haurren gurasoek bizipen tailerretan parte hartu dute, Jon Urdineta eta Itziar Rosado psikomotrizistak gidari zituztela. Orain, 6-18 urte bitarteko haur eta nerabeen gurasoen txanda izango da, eta, apirila bitarte, lau hitzaldi horietan parte hartzeko aukera izango dute. 

Albiste erlazionatuak