Astelehenean zabalduko da neguko kirol ikastaroetan izena emateko epea

2021/11/24
2022ko eskaintzan aldaketak egin dituzte haurren igeriketan: taldeak iraunkorrak izango dira, eta bestalde, ‘Itsas izar’ taldea sortuko dute, urari beldurra dioten edo igerian esperientziarik ez duten 3-4 urteko haurren taldea.

Urtarrilaren 10ean hasiko dira neguko ikastaro guztiak. Ikastaro guztietarako izen ematea datorren astelehenean (azaroak 29) zabalduko da: izen-ematea kiroldegian bertan egin beharko da, goizeko 6:30etik aurrera.

Gazte eta helduei dagokionez ohiko eskaintza egongo da 2022an ere: pilates, cycling, TRX, ZUMBA edota igeriketa, besteak beste. Haurren lehorreko jardueretan ere ez da aldaketarik egongo. Ikastaro horiek guztien irapena hiruhilabetekoa izango da.

Haur eta haurtxoen igeriketa taldeetan bi aldaketa nagusi egingo dituzte 2022an:

  • Talde iraunkorrak: aurrerantzean haurren igeriketa taldeak iraunkorrak izango dira, eta igeriketan izena ematen duten haurrak talde berean egongo dira urtarrilaren 10etik maiatzaren 26ra bitartean. Bi arrazoi nagusi daude horretarako: alde batetik, talde aldaketarekin bestelako jarduerekin ordutegiak moldatzeko gurasoek izan ohi dituzten arazoak; eta bestetik, haurrak taldean egonkortu eta gero taldea aldatzea saihestea
  • Itsas izar’ taldea sortzea, urari beldurra dioten edo igerian ez dakiten 3-4 urteko haurrentzako: Talde honetako haurrek irakaslearekin egokitzapen-prozesua izango dute, eta gurasoak bertan egon ahal izango dira prozesu horretan. Gurasoak haurrarekin eta irakaslearekin batera uretan sartuko dira hasieran, eta pixkanaka, haur bakoitzaren prozesua kontutan hartuta, gurasoen partehartzea txikitzen eta urruntzen joango da.

> Neguko kirol ikastaroen eskaintza (2022)