Eider Rodriguez eta Alex Gurrutxagaren arteko solasaldia, eta ipuin kontaketa musikatua antolatu dituzte Liburuaren Egunaren bueltan
'Irakurtzen duten zumaiarrak arriskutsuak dira' lemapean antolatu ditu ekitaldiak Zumaiako Udalak, irakurtzearen onurak nabarmendu eta zumaiarren artean irakurzaletasuna bultzatzeko.
Apirilaren 23an Liburuaren Nazioarteko Eguna izanik, irakurzaletasuna sustatu eta irakurtzearen onurak nabarmentzeko ekitaldiak antolatu ditu Zumaiako Udalak. Josu Egaña, Arantxa Eizagirre eta Garbiñe Barredo liburuzainek, eta Marina Bidasoro kultur zinegotziak eman dituzte egitarauaren inguruko xehetasunak.
Apirilaren 7an (osteguna) harpa instrumentuaz lagundutako ipuin kontaketa izango da. Mapa eskutan hartuta, “Arpa Magikoaren lurralde ezkutura” eramango dituzte haurrak, han dagoen liburu magikoaren barrenak ezagutzera. Ekitaldia 4 eta 8 urte bitarteko haurrei zuzenduta dago eta 17:30ean izango da, haurren liburutegian.
Apirilaren 11n (astelehena) Alex Gurrutxagak Eider Rodriguez elkarrizketatuko du. Rodriguezek argitaratu berri duen Eraikuntzarako materiala (Susa, 2021) liburuaz ariko dira, baita literaturaz edo irakurketaz ere. Ekitaldia 19:00etan izango da, liburutegiko azken solairuan.
Ekitaldiak aurkezteaz gain, liburutegia erabiltzera gonbidatu dituzte zumaiarrak. Gainera, datorren astetik aurrera liburuak mailegatzean Liburuaren Egunerako prestatutako orri-markatzaileak banatuko dituzte. Halaber, gogorarazi dute nobedade eta gomendioen zerrendak argitaratzen dituztela sare sozialetan. Zumaiako udal liburutegia astelehenetik ostiralera 09:30etik 20:00etara, eta larunbatetan 9:30etik 13:00era bitartean egoten da zabalik.
“Irakurtzen duten zumaiarrak arriskutsuak dira” lema aukeratu du Zumaiako Udalak Liburuaren Egunerako. Women who read are dangerous (ed. Stefan Bollmann) liburuaren azalean oinarritu da, eta margolana Vittorio Matteo Corcosek 1896an egindakoa da. Marina Bidasoro zinegotziak azaldu duenez, "irakurtzea erradikal eta arriskutsutzat jo da historiaz zehar, eta emakume zein bazterreko askorentzat autonomia eta pentsamendu kritikoa garatzeko bidea izan da urteetan". "Irakurtzen duten herritarrak pentsatzen duten herritarrak izanik", irakurzaletasuna sustatzearen garrantzia nabarmendu du Bidasorok.
Irakurri matte irakurle taldea
Ekitaldi horiek aurkezteaz gain, Irakurri matte irakurle taldean parte hartzera gonbidatu dituzte zumaiarrak. Hilabetero liburu baten bueltan aritzeko elkartzen dira Zumaiako irakurzaleak, Uxue Alberdik gidatuta. Hurrengo saioa apirilaren 5ean izango da: Eneko Aizpuruaren Bidasoan gora (Elkar, 2020) liburua landuko dute, idazlearekin batera. Beste bi saio ere iragarri dituzte: maiatzaren 10ean Natalia Ginzburgen Familiako lexikoa (Igela, 2021) liburuaz ariko dira; ekainaren 21ean, berriz, Irene Vallejoren Infinitua ihi batean (Pamiela, 2021) izango dute hizpide, Fernando Rey itzultzailearen ondoan.
Albiste erlazionatuak
Zumaia bizitzeko da
- San Telmo ermita ezagutzeko bisita gidatuak izango dira datorren astetik aurrera, baita ingurumena babestu eta euskara sustatzeko ekimenak ere 2024/06/28
- Udal adierazpena, LGTBI+ Harrotasunaren Nazioarteko Egunean 2024/06/28
- 360.000 euroko dirulaguntza lortu du Udalak, Aita Mari eraikina eraberritzeko 2024/06/27
- Tentsio handiko etxebizitza eremu izendatzeko eskaera formala egin du Zumaiako Udalak 2024/06/19
Haurrak
- Udalekuetan parte hartuko duten haurren gurasoekin bilerak egingo dituzte ekainaren 20an 2024/06/11
- Zabalik dago Musi-K udalekuetan izena emateko epea 2024/06/07
- Datorren ikasturteko haurren igeriketa ikastaroetan izena emateko epea zabalik, uztailaren 12ra arte 2024/06/03
- Bizikleta eguna izango dugu Zumaian larunbat honetan 2024/05/29
Kultura
- Aita Mari antzokia itxita egongo da ekainaren 21etik uztailaren 9ra 2024/06/20
- Sanpedroak ate joka, aurtengoan, berrikuntzekin 2024/06/19
- Maiatzaren 13an zabalduko dute Musika eta Dantza Eskolako matrikulazioa 2024/05/10
- Udaberria bero iritsi da Zumaiara, adin guztietako herritarrentzako ekitaldi askorekin 2024/04/30