‘Irakurri matte’ irakurle taldean parte hartzeko izena eman beharko da aurten

2020/09/16

Uxue Alberdiren gidaritzapean elkartzen dira irakurle taldeko kideak, irakurritakoak norberari zer ekarri eta iradoki dion partekatzeko. Aurtengoan, egoerak behartuta, taldean parte hartzeko beharrezkoa izango da izena ematea.

Uxue Alberdi idazle eta literaturzaleak gidatzen duen irakurle taldeak bederatzigarren ikasturtea du Zumaian. Orain artean Hilabetean behin Alondegiko Moila gelan bildu izan dira taldekideak, irakurritakoak norberari zer ekarri eta iradoki dion partekatzeko. Saio guztiak astearteetan egiten dituzte, 18:00etan.

Orain artean saio irekiak antolatu izan dituzte, baina bizi dugun osasun egoerak behartuta, taldean zenbat kide izango diren aurreikustea beharrezkoa izango da. Hori horrela izanik, aurtengoan behintzat, parte hartu nahi dutenek izena eman beharko dute irailaren 30a baino lehen, euskara@zumaia.eus helbidera idatzita edo 943865025 (luz. 6) telefonora deituta. Honako datuak zehaztu beharko dituzte: izen-abizenak, telefonoa eta e-posta.

Liburu zerrenda prest

Dagoeneko aurreratu dituzte ikasturte honetan irakurriko dituzten lehen liburuen izenburuak, baita bisitan izango dituzten bi irakurleren izenak ere.

Urrian Joxe Agirreren Nobela errealista bat irakurriko dute, eta idazlearen bisita izango dute urriaren 13an. Azaroaren 10ean Carson McCullersen Kafe tristearen balada liburuaz hitz egiteko bilduko dira. Abenduan 8an Maddi Ane Txoperena idazle gaztearekin bilduko dira, Ene baitan bizi da nobela irakurri ostean. 2021ean irakurriko landuko dituzten bi libururen berri ere eman dute: Ingerberg Bachmann-en Aldibereko eta Margaret Atwood-en Neskamearen ipuina.

Irakurle taldearen inguruko informazio gehiago nahi izanez gero, egin klik hemen.

 

 

‘Irakurri matte’ irakurle taldean parte hartzeko izena eman beharko da aurten

Albiste erlazionatuak

Zumaia bizitzeko da

Euskara

Kultura

Liburutegia