Gazteentzako literatur tailerrean izena emateko epea ostiralean amaituko da

2020/01/29

15 eta 18 urte bitarteko gazteei zuzendutako tailerra izango da. Ikastaroa doakoa da eta urtarrilaren 31 bitartean eman daiteke izena.

Gazteen artean literatur sormena bultzatzeko asmoz antolatu du Udalak ikastaroa, bigarren urtez jarraian. Paul Beitia Ariznabarreta irakasleak sei saiotan idazketa zein irakurketa landuko du gazteekin: Zertarako literatura galdetzea zertarako bizi edo zertarako ulertu galdetzea bezain absurdoa eta, era berean, beharrezkoa da. Beraz, zertarako literatura? Zertarako idatzi, zertarako irakurri? Horrexetarako: bizitzeko, bizi duguna eta gaituena hobeto ulertzeko. Ikastaro honetan idazteaz eta irakurtzeaz jardungo dugu, idatzi eta irakurri egingo dugu, bi ekintza horiek modu kolektiboan baino lulertu ezin diren ideiatik abiatuta. Elkarrekin sortuko dugu: guk idatzia besteei irakurriz, besteei entzunetik abiatuz, elkarri iritzia emanez.
Literatura saioak sei ostegunetan izango dira Alondegian, 18:30etatik 20:00etara. Tailerra otsailaren 6an hasiko da eta maiatzaren 7an amaituko da. Tailerra doakoa da, eta interesa dutenek urtarrilaren 31 bitartean eman dezakete izena. Horretarako Alondegia kultur etxean eman daiteke izena (9:30-14:00), 943861056 zenbakira deituta edo alondegia@zumaia.eus helbidera idatzita.