Irisgarritasunari buruzko galdetegia betetzeko epea zabaldu du Udalak

Dagoeneko martxan dago Zumaiako Irisgarritasun Plana osatzeko parte hartze prozesua. Herritarrekin batera udalerriko irisgarritasun-baldintzak hobetzeko interbentzioak aztertu eta proposatuko dituen plana osatuko du Udalak. Udal eraikinak, espazio publikoa, garraioa zein komunikazioa aztertuko ditu herritarrekin batera, eta irisgarritasuna hobetzea helburu duen bideorria zehaztuko du.

Lehen pausua herritarren iritzia jasotzea izango da. Udala zenbait elkarterekin harremanetan dago dagoeneko, baina horretaz gain, herritar orok eman ahal izango du bere iritzia inkesta bat beteta.

Bete inkesta hemen klik eginda (epea: abenduak 6)

Lau atal eta proposamen zehatzak

Lau atal nagusi aztertuko dituzte parte hartze prozesu osoan zehar. Alde batetik, kaleetan eta espazio publikoan jarriko dute arreta, hiri-altzarien (txokoak, bankuak, iturriak, lorontziak, paperontziak, edukiontziak, postontziak...) diseinua eta kokapena aztertuz. Atal berean eskailera, arrapala, oinezkoentzako pasabide, komun publiko zein igogailuen egokitasuna landuko dituzte. Bestetik, 31 udal eraikin aztertuko dira, sarrera eta irteerak, barne-komunikazioa, bulegoak zein higiene-zerbitzuak aztertuz. Halaber, autobus-geltokien eta mugikortasun urriko pertsonentzako aparkalekuen gaia ere aztertuko dute.

Azkenik, zeharlerro moduan, komunikazioan jarriko dute arreta, seinaleek zein Udalaren webguneak oinarrizko baldintzak betetzen ote dituzten aztertuz. Adierazleak, errotuluak, piktogramak eta bestelakoak aztertuko dituzte atal honetan.

Azterketa horiek eginda osatuko da Irisgarritasun Plana. Zehazki, lau arlo horietarako jarduketa proposamenak osatuko dira herritarrekin batera, pixkanaka, lehentasunen arabera, hobetze-lanak gauzatzeko.

Irisgarritasun Plana osatzeko parte hartze prozesuaren webgunea

Albiste erlazionatuak