Joseba Sarrionandiak literatura-tailerra emango du Zumaian

Urriaren 1, 8, 15 eta 22an egingo da tailerra, Zumaiako Alondegia kultur etxean, 1. solairuan, goizeko 10:00etatik 13:00etara, Urola Kostako Udal Elkarteak eta herri horietako euskara-zerbitzuek elkarlanean antolatuta. Euskaraz sortzen eta idazten trebatu nahi duten herritarrei bideratuta dago. 12 orduko ikastaroa izango da, hiruna orduko lau saiotan banatuta.

Joseba Sarrionandia idazleak gidatuko du tailerra. Haren hitzetan, “irakurketa eta idazketa ohiko zereginak dira gure gizartean, etengabe irakurtzen eta idazten dugu, gehiena ia oharkabean eta modu autodidaktan; baina ipuin bat, eleberri bat, poema bat edo saiakera bat idatzi nahi duenak modu kontzientean egin beharko du, eta baliabide batzuk ikas ditzake horretarako. Horixe da tailer honen helburua”

Izen-ematea zabalik, irailaren 28ra arte

Zabalik da ikastaroan parte hartzeko izen-ematea, irailaren 28ra arte. Plaza-kopurua mugatua da eta izen-ematearen hurrenkera errespetatuko da eskabideak onartzeko. Hori bai, Aia, Orio, Zarautz, Getaria eta Zumaiako herritarrek lehentasuna izango dute, Prezioa 20 eurokoa izango da.

Izena emateko helbide honetara idatzi behar da:

• euskara@zumaia.eus

Argibiderik behar izanez gero, helbide horretara idatzi edo eta 943 86 50 25 (616 luz.) telefonora deitu.

Albiste erlazionatuak