Mugikortasun Planeko ekintzak lehenesteko tailerra egingo dute datorren asteazkenean (ekainak 11)

2025/06/03

Herritarrak erdigunean dituen eta Zumaiarako pentsatutako mugikortasun-eredua garatzeko ekintza plana prest dago. Jarduketa konkretu horiek lehenesteko saioa izango da asteazkenekoa; 18:30ean izango da, Oxford aretoan, eta parte hartzeko aurrez eman beharko da izena.

E11.mugikortasun.tailerra.pngZumaiako Udalak duela urtebete abiatu zuen Hiri Mugikortasun Jasangarrirako Plana (HMJP) osatzeko prozesua. Plana Zumaia pertsona guztientzat irisgarria eta atsegina izateko bideorria izango da, eta ingurumen-jasangarritasunean oinarritutako mugikortasun-eredua bultzatuko du.

Diagnostiko batekin abiatu zuten prozesua. Horretarako, batetik, herritarrek betetako galdetegiak erabili dituzte. Gainera, egungo Zumaiaren azterketa egin dute teknikariek. Bertan identifikatutako ahuleziak, indarguneak, aukerak eta mehatxuak kontuan hartuta, herritarrak zentroan dituen mugikortasun-eredu bat planifikatzen duen ekintza plana prest dago dagoeneko.

> Eman izena

Orain, ekintza horiek lehenesteko momentua iritsi da. Planak jasotzen dituen ekintzetako asko epe ertain eta luzean garatzekoak badira ere, ezinbestekoa da horien garapena gaurtik pentsatzen hastea. Ariketa hori herritarrekin batera egin nahi du Udalak. Horrenbestez, asteazkeneko saioan, Mugikortasun Planean jasotako ekintza nagusiak azaldu, eta horiek lehenesteko ariketa kolektiboa egingo dute tailerrean parte hartuko dutenek.

Parte hartzeko aurrez izena ematea beharrezkoa izango da. Horretarako, mugikortasuna.zumaia.eus webguneko formularioa bete beharko da.

> Eman izena

Mugikortasun Planeko ekintzak lehenesteko tailerra egingo dute datorren asteazkenean (ekainak 11)