Torreagako 46 BOE etxebizitzen hitzarmena, Mugikortasun Jasangarrirako Plana eta Komentuko funtzionamendu araudia onartu dituzte uztailaren osoko bilkuran

Atzo onartu zen Zumaiako Udalaren eta Sukia Eraikuntzak SL enpresaren arteko hitzarmena, Torreaga 12 eremuan eraikiko diren 46 babes ofizialeko etxebizitza, 17 trasteleku eta garajeen zozketa eta esleipena arautuko duena. Hitzarmenari hasierako onarpena eman zitzaion atzokoan, eta oinarriok behin betikoak bihurtzean egingo da deialdi ofiziala. Udal gobernuak joan den astean eman zituen jakitera etxebizitza hauen zozketan parte hartzeko beharrezko baldintzak. Momentuz, interesdunek honakoa izan behar dute gogoan: irailaren 19a baino lehen Etxebiden etxebizitza eskatzaile gisa izen-emateko eskaera modu egokian egitea.

> Torreagako BOE etxebizitzei buruzko informazioa

Hitzarmenaren hasierako onarpena ahobatez onartu zuten. Edonola ere, EAJk kritikatu zuen haiek egindako errolda baldintzen eskakizunen proposamena aintzat ez hartu izana. Xabier Odriozolak (EAJ) azaldu zuen haien proposamena honakoa zela: gutxienez azken 5 urteetan etenik gabe Zumaian erroldatuta egotea, edo azken 20 urteetan zehar gutxienez 10 urtez erroldatuta egon izana. Iñaki Ostolaza alkateak azaldu zuen erroldari lotutako baldintza udalbatzak ahobatez onartutako irizpide batean oinarritzen dela; hain justu, duela urtebete onartu zen etxebizitza tasatuei buruzko ordenantza, eta, orduan, alderdi guztiek eman zioten baiezkoa gaur egun zehaztutako errolda baldintzei.

Gaiaren inguruan eztabaidan egon ziren bi aldeak. Xabier Odriozolak nabarmendu zuen EAJren gobernuak abiatutako promozioa zela honakoa, eta Iñaki Ostolazak gogoratu zuen orduan egindako hitzarmenak legez ezarritako gutxieneko etxebizitza babestuak jaso zituela. Halaber, nabarmendu zuen Torreagako promozioari izaera soziala gehitzeko lanean aritu direla azken urteotan: 12 etxebizitza eskuratuko ditu Udalak alokairu sozialera bideratzeko edo apartamentu tutelatu moduan erabiltzeko; gainera, Udalak eskuratuko duen 1.400m2ko espazioa zaintzarekin lotutako azpiegituretarako erabiliko dute.

Bestelako gaiak ere aztertu zituzten. Kale izendegian bi toki berriri izena jartzea adostu zuten: Torreaga plaza eta Alpersail kalea. Gainera, udal ordezkari politikoen eta langileen soldatak %0,5ean igotzea adostu zuten aho batez. Mugikortasun Jasangarrirako Plana eta Komentuko barne funtzionamendurako araudia ere landu zituzten.

Mugikortasun Jasangarrirako Plana, norabidea finkatzeko

Zumaiako Hiri Mugikortasun Jasangarriko Planak ere hasierako onarpena jaso zuen atzoko bilkuran, 10 aldeko boto eta 6 abstentziorekin. Argi Yeregi zinegotziak azaldu zuen prozesua irekia eta parte-hartzailea izan dela, eta planak oinezko eta bizikleten mugikortasuna jartzen duela lehentasun moduan, baita genero ikuspegia ere. Azpimarratu zuen planak 8 eta 80 urte bitarteko pertsonentzat bizigarri izango den espazio eredua proposatzen duela, eta jarduketa bakoitzak bere lanketa propioa izango duela. Planak, beraz, herri jasangarri eta bizigarri baterako gidalerro orokorrak jartzen ditu. Planari buruzko informazio gehiago webgune honetan eskura daiteke.

EAJk adierazi zuen ados dagoela planteamenduarekin, baina kritikatu zuen plana "atzerapenarekin datorrela". Alegazioetarako epea irekiko da orain, eta udal talde guztien zein herritarren ekarpenak jasotzeko txanda.

Komentuko barne funtzionamendua, elkarlana oinarri

Komentuko kultur topagune berrirako funtzionamendu araudia ere aztertu zuten. Azken hilabeteetan Elhuyarrekin batera garatutako prozesu partekatu baten emaitza izan da dokumentua. Araudiak jasotzen ditu gobernantza komunitarioa, espazioaren erabilera eta dinamizazio irizpideak, besteak beste.

Udalaren helburua da Komentua Zumaiako kultur dinamikaren erreferentziazko lekua eta erakuslehioa izatea, herriko eragile asko bilduko dituen espazio bizia bihurtuz. Prozesuan parte hartu duten guztiei eskerrak eman zizkien Marina Bidasoro kultur zinegotziak, guztiek azaldu duten konpromisoagatik, jarreragatik eta prestutasunagatik.

Albiste erlazionatuak