Mugikortasun Jasangarrirako Plana egiteko prozesua abiatu du Udalak, eta inkesta bat zabaldu die herritarrei

Zumaiako Udalak hasiera eman dio Hiri Mugikortasun Jasangarrirako Plana (HMJP) egiteko prozesuari, herritarrek aktiboki parte hartzeko deia eginez. Prozesu estrategiko eta parte-hartzailea izango da honakoa, egungo mugikortasunaren puntu kritikoak detektatzeko eta mugikortasunaren garapena hobetzera eta herritarren bizi-kalitatea bermatzera bideratutako proposamenak batera diseinatzeko. Iñaki Ostolaza alkateak, Argi Yeregi hirigintza zinegotziak, Gorka Arregi udal arkitektoak eta Ainhoa Cuartango Tech Friendly-ko teknikaria eman dituzte planaren helburuen eta prozesuaren inguruko xehetasunak.

Plan honen helburua da Zumaia udalerri irisgarria eta atsegina izatea pertsona guztientzat, ingurumen-jasangarritasunean oinarritutako mugikortasun-eredua bultzatuz. Prozesu horretan, bereziki kontuan hartuko dituzte haurren, gazteen, emakumeen, adinekoen eta mugikortasun urriko pertsonen beharrak. "Horrela, kolektibo horien ikuspegiak aintzat hartuta, Zumaia herri atsegina izango da guztiontzat", adierazi du Iñaki Ostolaza alkateak.

> Bete galdetegia

Argi Yeregi hirigintza zinegotziaren esanetan Mugikortasun Plan eguneratua edukitzea "garrantzia handikoa eta lehentasunezkoa" da. Plan honen bidez "Zumaia epe ertainean eta luzean nolakoa izango den marraztuko dugu". Irizpide argi batekin egingo dute lan: mugikortasun iraunkorragoa, seguruagoa eta inklusiboagoa sortu nahi dute; "beti esaten dugun moduan, Zumaia bizitzeko da, eta horretarako, pertsona guzti-guztiak gure politiken erdigunean jarri behar ditugu", azaldu du Yeregik. Prozesu guzti honetan Zumaiako kaleak, espaloiak, garraio publikoa, oinezkoentzako guneak eta bestelako hiri-elementuak barnebilduko dituen plangintza integral bat egiteko oinarriak jarriko dituzte.

Prozesua gidatzeko "lan-talde sendoa eta profesionala" osatu dute, Gorka Arregi udal teknikoaren esanetan. Zumaiako Udalak TECH Friendly eta Buchanan enpresen laguntza teknikoa izango du prozesua gidatzeko, eta, bide osoan zehar ondoan edukiko dituzte herriko elkarte, kolektibo eta eragileak. 

Herritarren parte hartzearen garrantzia

Hiri Mugikortasun Jasangarriaren Plana egiteko herritarren partehartze aktiboa sustatu nahi dute. Horretarako, lehen pauso moduan, Zumaiako biztanleei zuzendutako galdetegi bat zabaldu dute, mugikortasunaren arloan dituzten ohiturak eta beharrak jasotzeko. 

"Guretzat garrantzitsua da bizilagunen iritzia. Herritar guztiak gonbidatu nahi ditugu parte hartzera eta inkesta betetzera. Eta norbaitek laguntza behar badu, eska diezaietela mesedez laguntza senideei eta lagunei, bete dezaten, ezinbestekoa baita galdetegi hau zumaiar guztiei iristea", eskatu du Argi Yeregi hirigintza zinegotziak. Online inkesta zabalik dago dagoeneko, eta hilabetez egongo da zabalik, ekainaren 9ra arte.

> Bete galdetegia

Bestalde, hezkuntza-komunitateari zuzendutako inkesta berezi bat ere landuko dute. "Haurrek zeresan handia dute gure herriko mugikortasunaren inguruan", azaldu du Ainhoa Cuartango TECH Friendly enpresako teknikariak. 

Webgunea ere prestatu dute, prozesuaren nondik norako guztien jarraipena egiteko: mugikortasuna.zumaia.eus.

Mugikortasun eredua eguneratu beharra

Gorka Arregik, udal arkitektoak, 2005ean idatzitako Zumaiako Mugikortasun Plana berrikusteko beharra azpimarratu zuen, azken urteetan udalerrian eta gizartean izandako aldaketa esanguratsuengatik. Azaldu zuenez, gaur egungo mugikortasun-ohiturek (automobil pribatuaren erabilera handia dute ezaugarri) eragin negatiboa dute ingurumenean eta hiri-kalitatean, baita herritarren eguneroko bizitzan ere.

Arregiren arabera garrantzitsua dela mugikortasun jasangarriagoko eredu baterantz aurrera egitea, energia-kontsumo txikiagoarekin eta garraio indibidualaren murrizketarekin, sistema kolektiboen eta motorrik gabeko garraiobideen mesedetan. Udalerriko garraio- eta mugikortasun-sistemen diseinuan genero-ikuspegia txertatzeko beharra ere nabarmendu zuen.

Lau fase

Ainhoa Cuartango TECH Friendlyko ordezkariak Zumaiako Mugikortasun Jasangarrirako Plana egiteko prozesua azaldu zuen. Plan horrek funtsezko hainbat fase izango ditu. 0 fasea prozesuaren antolaketan eta hasieran oinarrituko da, eta helburuak eta lantaldea ezarriko dira; 1. fasean, Zumaiako mugikortasunari buruzko informazio garrantzitsua aztertu eta diagnostikatuko da; 2. faseak planaren aurretiazko bertsio bat garatzea ekarriko du, mugikortasuna hobetzeko proposamenekin; azkenik, 3. fasean planaren azken bertsioa egingo da, herritarren eta inplikatutako eragileen atzeraelikaduran oinarrituta.

Gainera, herritarrek proiektuaren etapa guztietan parte-hartze aktiboa izatearen garrantzia azpimarratu zen, zeharkako komunikazio-lerro baten bidez.

> Informazio gehiago: mugikortasuna.zumaia.eus

Albiste erlazionatuak