'Zumaian euskararekin zer?' prozesuaren barruan partaidetza saioei ekingo diete urrian

Aurrera doa Zumaian euskararekin zer? partaidetza prozesua. Udala hurrengo 10 urteetarako plan estrategikoa lantzen ari da, Ahize hizkuntza aholkularitzaren bidelaguntzarekin, eta herritarrekin batera. Iraileko galdetegi fasea amaitu eta gero, hausnarketa faseari ekingo diote orain.

Zumaiako herritar eta eragileekin batera bost eztabaida saio egingo dituzte urrian eta azaroan zehar, Zumaian euskararen egungo egoera eta etorkizuna aztertzeko. Esparruak egingo dute azterketa urrian zehar, eta azaroan oikiarrekin saio berezia egingo dute. 

Honakoak dira saioak:

• Urriak 15, asteartea: Hezkuntza eta familia, 10:00-12:00
• Urriak 17, osteguna: Kirolak, 18:30-20:30
• Urriak 28, astelehena: Kultura, 18:00-20:00
• Urriak 30, asteazkena: Arlo sozioekonomikoa, 14:00-16:00
• Azaroak 12, asteartea: Oikiako saioa, 18:00-20:00

Zumaiako saio guztiak Alondegiko Oxford aretoan egingo dituzte.

Saio hauek irekiak izango dira herritar guztientzat, baina parte hartzeko aldez aurretik izena ematea beharrezkoa izango da. Izena emateko, egin klik hemen.

> Eman izena lan-mahaietan

280 herritarren erantzunak mahai gainean

Lehenengo fasean, 280 herritarrek bete dute galdetegia, hasierako helburua (150 parte-hartzaile) nabarmen gaindituz. Herritarrek azken urteetan Zumaian euskararen inguruan egin diren ekintzak aztertu dituzte, eta iritziak partekatu dituzte. Gainera, hainbat herritarri banakako elkarrizketak egin dizkiete, besteak beste, Esti Curiel, Juan Luis Sanchez, Ianire Flores eta Lore Garciarenari.

Hurrengo fasean, lan-mahaietan jasotako ekarpenak, banakako elkarrizketak eta herritarrek betetako galdetegietatik ateratako ondorioak batu, eta, 2034ra arteko euskara plan estrategikoaren oinarriak zehaztuko dituzte Ahize-AEK elkarteko teknikariek. Proposamena oinarri hartuta, azaroan zehar herritarrekin batera itxiko du plana Zumaiako Udalak. Horrela, zumaiar guztien hitza entzunda, AROA plan estrategikoaren diseinu prest egongo da abendurako. Ondo bidean, 2025eko otsailean gizarteratuko du Udalak plan berria, Euskara, bestela ez gara zikloaren barruan.

Zumaiako Udalak herritar oro gonbidatu nahi du prozesu honetan parte hartzera, euskararen alde lan egiteko aukera paregabea baita honakoa, euskararen oraina eta etorkizuna eraikitzeko bidean.

Albiste erlazionatuak