Herriko komertzioak indartzeko ‘Errotaherria’ kanpaina martxan jarri du Udalak, eta deskontu bonuak banatuko dizkie herritarrei

2020/05/21

‘Errotaherria’ kanpainarekin “herriari eman dioten bizitza itzuli” nahi die Udalak dendei, herritarrekin elkarlanean. Lehen ekintza gisa Udalak deskontu txartelak banatuko dizkie 18 urtetik gorako zumaiar guztiei, eta dendariei laguntzeko 150.000 euro bideratuko ditu.

Errotaherria kanpaina aurkeztu dute gaur eguerdian Iñaki Ostolaza alkateak, Alex Oliden zinegotziak, Itxaso Curiel merkatari eta Gertu elkarteko kideak, Amaia Aizpurua merkatariak eta Fernando Mott ostalariak.

Alex Oliden Tokiko garapenerako zinegotziak azaldu duenez, kanpaina honen bidez “herritarren ohituretan eragin, eta urteetan herriko dendek herriari eman dioten bizitza itzuli” nahi diote. Marea errotak erabili dituzte metafora gisa: “garai batean, marea errotek, errioa mugiarazi, eta ordainetan, energia ematen zioten herriari; orain ere badigu marea errotak Zumaian: gure dendak. Dendak herriak mugitzen dituen errotak dira, herriak ematen diena bueltan ematen diote herriari”.

Spot batekin abiatu dute kanpaina:

Lehen ekintza deskontu bonuen sistema martxan jartzea izango da: Udalak 20 euroko deskontu txartel bana banatuko die 18 urtetik gorako herritar guztiei. Horrekin, Udalak lortu nahi duena da herritarrek bertan kontsumitzeko ohituran eragitea. 150.000 euro bideratuko dituzte neurri honetara, eta dinamikak herriko dendetan 450.000 eurorainoko inpaktu positibo zuzena izan dezakeela adierazi dute.

COVID-19ak kalte ekonomiko nabarmenak eragin ditu herriko merkatari eta ostalarien artean. Asteetako etenaldiaren ondoren, merkatari eta ostalari asko martxan dira berriz, prebentzio neurriak beteta. Itxaso Curiel merkatariaren arabera "gogorrak" izan dira azken asteak, baina "egoerara egokitzen asmatu" dute. Gertu elkarteak elkartekideengatik eta elkartekideak ez direnengatik egindako lana nabarmendu du, eta halako egoeretan "elkartuta eta elkarlanean" lan egitearen garrantzia azpimarratu du. Zumaiarren dei egin die herriko dendetara joateko; azaldu duenez, "segurtasun neurriak betetzea errazagoa da denda txikietan, eta ia beti, herritik kanpo bilatzen duguna herrian bertan aurkitu daitekeela".

Herritarren beharrei erantzun eta tokiko ekonomia sustatzea dagokigu erakunde publikooi. Horretan ari gara, arloz arlo egoera aztertu eta neurriak hartzen”, adierazi du Iñaki Ostolaza alkateak; "politika publiko indartsuak eta komunitate sendoa edukita aterako gara egoera honetatik". Enpresa txiki eta autonomoentzako diru-laguntza zuzenak martxan jartzen ari direla azaldu du alkateak.

20 euroko deskontu txartela herritar guztientzat

Errotaherria” kanpainaren baitako lehen ekintza gisa Udalak deskontu bonuak banatuko dizkie 18 urtetik gorako zumaiar guztiei. 20 euroko deskontu bana bidaliko du Udalak etxeetara; bonu bakoitza 5 euroko lau balek osatuko dute, eta baleak banaka zein batera erabili ahal izango dituzte herritarrek, ekainaren hasieratik uztailaren 31ra bitartean. Deskontu txartelak non eta nola erabili jakiteko argibide zehatzak aurki jakinaraziko ditu Udalak, zumaia.eus orrialdean.

Deskontu txartelen kanpainan parte hartu ahal izango duten dendak honakoak izango dira: konfinamendu aldian komertzioak itxita eduki behar izan dutenak, eta irekita izanda ere, diru-sarrerak %75 edo gehiago murriztu zaizkienek. Parte hartzeko oinarriak hemen daude bilduta. Baldintza horiek betetzen dituzten herriko merkatariek har dezakete parte kanpaina honetan. Parte hartzeko modu telematikoan eman beharko dute izena, maiatzaren 21etik 31ra bitartean. Zalantzak izatekotan 943143396 telefonora deitu eta turismoa@zumaia.eus e-mailera idatzi dezakete parte hartu nahi duten komertzioek.

Urtea amaitu aurretik ostalariei bideratutako deskontu txartelak egongo direla ere adierazi dute.

Enpresa txikientzat laguntzak

Enpresa txiki eta autonomoek diru-laguntza zuzenak edukitzeko aukera izango dute, COVID-19ak eragindako kalteak arintzeko. 10 langile arteko eta urtean 9.000 euro eta milioi 1 euro bitartean fakturatzen duten jarduera guztiei zuzendutako laguntzak izango dira, eta gehienez, 2.000 euroko laguntza jasoko dute.

Emango den laguntzaren kopurua atalka antolatuko da eta irizpide ezberdinen araberakoa izango da: jarduera itxita egoteagatik edo ohiko jardueraren murriztapen nabarmenagatik, edota alokairu zein mailegua ordaintzeagatik eskatu ahal izango da laguntza, besteak beste.

Laguntza hau bateraezina izango da Covid-19aren hedapenak sortutako alarma-egoeraren ondorioz Lanbidek edo bestelako erakundeek helburu berarekin emandako laguntzekin.

Enpresa eta autonomoei zuzendutako laguntzak

Albiste erlazionatuak