Auzoetako behar eta proposamenak landuko dituzte martxoaren 15ean

2022/03/10

Zumaiako Udalak 2023ko eta 2024ko udal aurrekontua herritarren artean eztabaidatu eta erabakitzeko partaidetza prozesua abiatu du. Martxoaren martxoaren 15eko saioan auzoetako behar eta proposamenak aztertuko dituzte. Gainera, ostiral honetan bertan, postua jarriko dute Saregile plazan.

Martxoaren hasieran Zumaiako Udalak galdera luzatu zien herritarrei: 'Zer egingo zenuke Zumaian 500.000 eurorekin?'. Izan ere, 2023 eta 2024ko aurrekontuetan herritarrek aukeratutako proiektuak txertatuko dituzte. Dagoeneko jaso dituzte 20 proposamen inguru, herrian zehar jarritako postontzietan zein partaidetza webgunean. Proposamen eta ideiak aurrez aurre ere jasotzeko aukera izango da, ordea. Hiru saio ireki egingo dituzte martxoan zehar, eta bi egunez, aurrez aurre proposamenak jasotzeko postua egongo da Saregile plazan.

Lehenengo saio irekia martxoaren 15ean (asteartea) egingo dute, 18:00etan Oxford aretoan. Saio honetan, bereziki, auzoetako behar eta proposamenak landuko dituzte. Horregatik, Zumaiako Udalak deialdi berezia egin nahi die auzo desberdinetako herritarrei, horiek direlako beraien auzo eta kaleen beharrak ondoen ezagutzen dituztenak. Edonola ere, bestelako proposamenak jasotzeko aprobetxatuko dute saioa.

Hasierako sarrera eta girotze dinamikaren ondoren, partehartzaileek talde txikitan landuko dituzte proposamenak. Norbanakoen proposamenetik taldearen proposamenetarako bidea egingo dute, eta bukaeran, plenarioan, proposamen zerrenda osatuko dute. Euskaraz izango da saioa, baina aldibereko itzulpena egongo da gaztelerara.

Horrez gain, ostiral honetan bertan (martxoak 11), postua jarriko dute Saregile plazan. 10:00etatik 13:00era, eta 18:00etatik 20:00etara herritarrek aurrez aurre egin ahal izango dituzte proposamenak.

Informazio gehiago:
> Eskuorria
> partaidetza.zumaia.eus


Proposamenak egiteko epea zabalik, martxoaren 31ra arte

Lau aukera daude proposamenak egiteko:

  • Orria bete eta postontzietako batean uztea. Udaletxean, kiroldegian, Alondegian, Gizarte Zerbitzuetan eta Oikiako eskolan jarri dituzte positontziak.
  • Kalean egongo diren standetara hurbiltzea. Martxoaren 11n eta 25ean Saregile plazan egongo da horretarako aukera, 11:00etatik 13:00era eta 18:00etatik 20:00etara.
  • Saio irekietan parte hartzea. Martxoaren 15ean, 24an eta 29an saio irekiak egingo dituzte Alondegiko Oxford aretoan, arratsaldeko 18:00etan.
  • Proposamenak online egitea, partaidetza.zumaia.eus webgunean.

Proposamenak jaso eta gero, zer?

Lehenengo fasean, martxoan, herritarren proposamen eta ideiak jasoko dituzte, aurrez azaldutako moduan. Apirilean ekingo diote bigarren faseari. Herritarrak, ordezkari politikoak eta udal teknikariak elkarrekin arituko dira lanean, pertsona zehatz baten proposamena izatetik Zumaia hobetzeko proiektu izatera igo daitezen. Bilera irekiak egingo dituzte, eta, "guztien artean, hainbat irizpide kontutan hartuta, jasotako proposamenak lehenetsiko dira", azaldu du Alberdik. Lan saio horiek bukatzean, jasotako proposamenak aztertu eta balorazioak egingo dituzte udal langileek.

Irailean helduko diote berriro ere prozesuari. Orduan, lehetsitako proiektu horien arteko aukeraketa egiteko momentua izango da. Zumaian erroldatutako 16 urtetik gorako herritar guztiek proiektuak bozkatzeko aukera izango dute.

Azkenik, proiektu bozkatuenak 2023 eta 2024ko aurrekontuetan txertatuko ditu Zumaiako Udalak, 250.00 euro urte bakoitzean.

Auzoetako behar eta proposamenak landuko dituzte martxoaren 15ean