Film laburren saioa izango da Zumaian ostegun honetan, Zinegoak programaren barruan

Zinegoak Bilboko gaylesbotrans Zinema eta Arte Eszenikoen jaialdia Zumaiara iritsi da beste urte batez. Casa Sussana filma eta film laburren saioa ikusteko aukera izango dute zumaiarrek.

Lehenengo saioa ekainaren 8an, ostegunean, izango da. Saio honetan, zazpi film labur ikusteko aukera izango da: Irrits (Zuz: Maider Oleaga), Ezohikoak (Zuz: Alejandra Bueno), Son (Zuz: Marta Nieto), Girls & the party (Zuz: Paloma Lopez), Arnasa (Zuz: Raúl Barreras), Perpetua felicidad (Zuz: Isa Luengo, Sofía Esteve), It´s a gray, gray world (Zuz: Seyed Mohsen, Pourmohseni Shakib). Ekitaldia 19:30ean hasiko da Aita Mari zineman, eta sarrera doakoa izango da.

Zinegoak 2004an sortu zen kulturaren, zinemaren eta arte eszenikoen bidez sexu aniztasunaren inguruan sentsibilizazioa lantzeko asmoz, eta 20 urteko ibilbidean zehar, Zinegoak erreferentzia bihurtu da LGTBIQ+ gaiko ekitaldi zinematografiko eta eszenikoen artean, eta edizio bakoitzean bere publikoa handitu da, 2022an gertatu zen bezala, non 35.000 pertsonak baino gehiagok hartu zuten parte jarduera presentzialetan zein birtualetan.

Casa Sussana filma, irailean

Maiatzaren 17an egitekoa zen Sébastien Lifshitz frantziarrak zuzendutako Casa Susanna film dokumentalaren proiekzioa, baina ekitaldia bertan behera uztea erabaki zuen Zumaiako Udalak, Orion jazotako erailketa matxista dela-eta. Filmaren proiekzioa irailaren 21era atzertua dute.

Albiste erlazionatuak