Udaberria bero iritsi da Zumaiara, adin guztietako herritarrentzako ekitaldi askorekin

Herriko festak amaitu berritan, Zumaiak dantzan eta bizi-bizirik jarraituko du maiatza osoan. Hamalaugarrenez, Astindu dantza elkarteak eta Zumaiako Udalak elkarlanean ekitaldi ugari izango dira hilabete osoan zehar, Maiatza Dantzan programaren barruan. Asteburu honetan bertan hasiko dute egitaraua, dan-tz egitasmoarekin elkarlanean antolatutako ekitaldiarekin: maiatzaren 4ean (larunbata) DJ ikastaroa eta emanaldiak izango dira Kofradian, Goiko eta Maitx DJ-en eskutik. Maiatzaren 11n Astindu Eguna ospatuko dute, eta beste hiru ekitaldi ere izango dira: tango ikuskizuna maiatzaren 18an, Dantzara! ikuskizuna maiatzaren 25ean, eta rueda cubana tailerra maiatzaren 26an.

Dantza egin eta ikusteko aukeraz gain, ordea, bestelako ekitaldi ugari izango ditugu herrian: kirol jarduerak, kirol jarduerak, hitzaldiak, zine-proiekzioak eta bakarrizketak, besteak beste. Egitarau osoa ikusgai dago dagoeneko.

Nagusiei zuzendutako egitarau berezia

Nagusien Mahaiak, Beheko plaza elkarteak eta Zumaiako Udalak maiatza eta ekainerako adinekoei zuzendutako egitarau oparoa prestatu dute. Beste hainbat eragile eta lagun ere ondoan izan dituzte: Musika Eskola eta KZGunea, besteak beste. Hitzaldiak, tailerrak eta jokoak prestatu dituzte, beste askoren artean. 90 urte bete(ko) dituzten zumaiarrei omenaldia ere egingo dute.

Egitarau guztia eskuorri batean bildu dute, eta hurrengo astean etxe guztietara bidaliko dute. Horiek horrela, herriko nagusiak gehien gustatzen zaizkien ekitaldietan parte hartzera gonbidatu dituzte.

XXXVI. Argazki Lehiaketan, musika protagonista

Distirak eta Udalak elkarlanean antolatzen duten XXXVI. Argazki Lehiaketan berezitasun bat gehitu dute aurtengoan: udaran egiten den Musika Hamabostaldiaren 40. urteurrena izanik, aurten musika izango da gaia —gai librea izan ohi da normalean—. Sasoi berean izango dira jaialdia eta argazki lehiaketako erakusketa, eta, aldaketa honekin, Musika Jaialdiari keinu bat egin nahi izan diote antolatzaileek.

Halaber, Distirarekin elkarlanean antolatutako beste ekitaldi berezi baten berri ere eman du Udalak: Elliot Erwitt-en El silencio suena bien dokumentala ekarriko dute Zumaiara, argazkigintzaren historian garrantzia handia izan duen lana.

Albiste erlazionatuak