[BIDEOA] Larunbaterako koreografia: Hitzez ekiteko garaia da!

Euskaraldia hasteko bi hilabeteren faltan, larunbat honetan, Olarro Egunean, entsegu orokorra egingo dute zumaiarrek. Horretarako, hainbat ekintza antolatu dituzte. Horietako bat da arratsaldean zehar egingo den kalejira: Euskaraldiaren abestiaren koreografia bat egingo dute arratsaldean lau tokitan, Beheko plazan hasi eta Amaia plazara bitartean, Astindu taldearen laguntzarekin.

Ekimena indartzeko bideo batean jaso da koreografia, jendeak ikasteko aukera izan dezan. Abesti hori txosnetan bertan ere jarriko dute, eta hitzak ikasteko paperak ere zabalduko dituzte. Abestiaren hitzak hemen ikus daitezke.

Olarro Eguneko txosnak, arigune

Azaroaren 18tik abenduaren 2ra bitartean izango da 2022ko Euskaraldia, hirugarren edizioa, hain justu ere. Euskaraldia ariketa sozial bat da, herritarrak aktibatzea eta euskara gehiago erabiltzeko jarrera egokiak lantzea bultzatu nahi duena. Lehenengo edizioan ahobizi eta belarriprest rolak landu ondotik, ariguneak zer ziren ikasi genuen, euskaraz lasai aritzeko aukera eskaintzen duen ingurunea: lanean, aisialdian…

Olarro Egunean, kalejira egiteaz gain, txosna guztiak ARIGUNE izendatuko dituzte, eta BANDERA batzuk jarriko dituzte hori adierazteko. Herritarrek jakingo dute lasai eska dezaketela euskaraz, barraren bestaldekoek ulertuko dietelako eta euskaraz erantzun ere bai. Hori errazteko, txosnan arituko direnek lehen hitza euskaraz egingo dute.

Aparteko postu bat ere jarriko dute Euskaraldiko batzordekideek, goizean Kofradia inguruan eta arratsaldean Beheko plazan. Postu horretan AHOBIZI edo BELARRIPREST pegatinak banatuko dira, herritarrek horren arabera joka dezaten. Era berean, Euskaraldiko materiala erakutsiko da (arropa) edo saldu ere bai (banderak). Azkenik, Estalapeko oholetan Euskaraldiaren horma irudi bat margotuko dute astean zehar, Olarro eguna bera eta datozen asteak girotzeko.

> Olarro Eguneko egitaraua

Albiste erlazionatuak