Estazio kalean hainbat hobekuntza egingo ditu Udalak

Zumaiako Udalak Estazio kaleko eremua berarntolatzeko eta espazio publikoa herritarren beharretara egokitzeko lanak abiatuko ditu datorren astean. Egingo diren eskuhartzeek helburu bikoitza dute: alde batetik, bizilagunek azken hilabeteetan egindako eskaerei erantzutea, eta bestetik, espazioaren erabilera publiko eta segurua bermatzea. Zumaiako Udalak 18.192 euro erabiliko ditu lan hauek egiteko.

Zehazki, honakoak dira egingo diren eskuhartzeak:

1. Plazatik edukiontziak kentzea eta gune berri baten sorrera: Estaziora bideko tunela eta gero dagoen plazatxoa herritarren erabilerarako uzteko asmoz, edukiontziak tren estazio ondoan kokatuko dira aurrerantzean. Horretarako, Hego kaleko 12. atariaren ondoko dagoen espazioa egokituko da. Lan hauen ondorioz, hiru aparkaleku desagertuko dira. Desgaitasuna dutenentzat gordetako aparkalekua lekuz aldatuko da, eta honakoaren irteera egokituko da. 

2. Biribilgune margotuaren ordez isleta fisiko bat eraikitzea: Gaur egungo biribilgune margotuak ez du bere funtzioa behar bezala betetzen, eta askotan gidariek ez dute araua errespetatzen. Horregatik, ibilgailuen norabideak antolatu, biratzeak segurtasunez bideratu eta abiadura murrizteko helburuz, isleta fisiko bat eraikiko da.

Horretaz gain, Hego kalean bertako bizilagunei lehentasuna emateko, Lagun Artea tabernatik Nardinera arteko aparkalekuak bertakoentzat izango dira aurrerantzean. Aparkalekuen margoketa lan horiek Udal Brigadak egingo ditu.

Datorren astelehenean (maiatzak 19) hasiko dituzte lanak, eta, aurreikuspenen arabera, hiru asteko epean amaituko dituzte. Trafikoan eragina izango du: tartekako bide-mozketak izango dira, eta ibilgailuak mantsoago ibili beharko dira. Oinezkoei dagokionez, obrek ez dute inolako eraginik sortuko.

Albiste erlazionatuak