'Euskara, bestela ez gara' zikloa asteazken honetan abiatuko da

2012tik urtero egin da Euskara, bestela ez gara hitzaldi zikloa, eta aurten, hirugarren urtez, Larraina euskara elkarteak antolatu du, Udaleko Euskara Zerbitzuarekin elkarlanean. Aurten mahai-inguru bakoitzak gai bat aztertuko du, eta, berrikuntza bat ere izango da: azken saioan bi ikus-entzunezko proiektatuko dituzte Aita Mari aretoan. 

Asteazken honetan (otsailak 18) abiatuko da zikloa, euskara eta hizkuntza indigenen inguruko mahai-inguruarekin. Hiru esperientzia eta hizkuntza aztertuko dituzte, euskararekin batera, eta elkar indartzeko aliantzez ariko dira. Hiru solaskide izango dira Alondegian: Maialen Sobrinok Ekuadorreko Kitxua herriarekin eta hizkuntzarekin lankidetzan aritu da; Paula Laita Kanadako Tsilhqot'in hizkuntza biziberri-lanen inguruko tesia egin du; eta Arkaitz Zarragak Kolonbiako Nasa hizkuntzaren biziberritze prozesuan parte hartu du. Mahai-ingurua 18:30ean hasiko da, Oxford aretoan.

Martxoaren 1ean Agurne Gaubeka Hizkuntza Eskubideen Behatokiko zuzendariak eskainiko du hitzaldia. Hizkuntza eskubideez ariko da, eta teoriatik praktikara salto egiteko gakoak jarriko ditu mahai gainean. Saio hau ere Oxford aretoan izango da, 18:30ean.

Martxoaren 22an, bigarren mahai-inguru bat izango da. Saio honetan natura, kulturak eta hizkuntzak elkar-lotuta aztertuko dituzte, eta galdera bati erantzuten ahaleginduko dira solaskideak: zergatik eta nola bihurtu hiru elementuok garapen jasangarriaren helburu?. Leire Barriuso Euskal Kostaldeko Geoparkeko gerenteak, eta Mikel Mendizabal Munduko Hizkuntza Ondarearen UNESCO katedrako kide eta 17+1 helduruen ekimenaren sustatzaileak helduko diote erronkari, Ana Galarraga zientzia dibulagatzaileak bideratuta. Solasaldia 18:30ean izango da, Oxford aretoan.

Aurtengo zikloko azken saioa bestelakoa izango da. Martxoaren 29an, Aita Mari zinean bi ikus-entzunezko proiektatuko dituzte: Josu Martinez zuzendariaren Anti fikziozko film laburra, eta Iban Gonzalez Pagaldairen Elbira Elbira Zipitriari buruzko dokumentala. Emanaldia 18:30ean hasiko da.

Albiste erlazionatuak