Martxan dago San Telmoko igogailua

Otsailean hasi ziren igogailua egiteko lanak, eta sei hilabete eta gero, gaur jarri dute martxan. Igogailuak San Telmo kalea eta Larretxo auzunea lotzen ditu, eta Udalak 295.500 euro bideratu ditu obra egitera. Udal Gobernuaren ustez igogailu honek bizilagun askoren egunerokotasuna erraztuko du, eta urrats garrantzitsua da Larretxoko oinezkoentzako irisgarritasuna eta mugikortasuna hobetzen jarraitzeko. Larretxo auzunearen irisgarritasuna hobetzen jarraitzeko lan egingo dutela ere azaldu du.

2021eko maiatzean Larretxoko bizilagunekin egindako bileran jasotako ekarpenak kontutan hartuta, igogailuaren goiko aldeko gunea ere hiritartu egin du Udalak. Eremuko espaloiak zabaldu ditu, eta  Larretxo auzuneko 7 eta 13 atarien arteko ur hornidura sarea berritzeko ere baliatu du.

Alkateak azaldu duenez, eremua hobetzeko bestelako lanak egitea dute buruan. Besteak beste, "plaza berdearen bi ertzetan malda irisgarriak eginez igogailua eta Larretxoko plataforma laua elkar daitezkeen ere aztertzen ari gara, azterketa horren emaitzaren arabera lan horiek egiteko". 

Itzurunbideko igogailuari dagokionez, ideia lehiaketa irabazi duen enpresarekin bildu, eta alternatiba egokiena bilatzeko lanketan murgilduta daudela azaldu du. Udazkenean zehar emango dituzte bigarren igogailu honen inguruko xehetasunak.