Merkataritzan euskarazko errotuluak jartzeko dirulaguntzak eska daitezke jada

2020/07/01
Urte asko dira Udalak laguntzak ematen dituela establezimenduetan euskarazko errotuluak jartzeko. Era askotako euskarriak izan daitezke, gainera: kanpoko errotuluak, toldoak, erakusleihoetako itsasgarriak… Errotulazio elementuaren kostuaren % 50 lagunduko da diruz, 300 euroko muga gainditu gabe.

Baldintzak:

Ezinbestekoa izango da honako baldintza hauek betetzea:

  • Establezimenduak helbide fiskala Zumaian duela.

  • Eskatzaileak betebeharrak eguneratuak dituela.

  • Udalaren baimena baduela (toldo eta antzekoak jartzeko)

  • Errotulua euskaraz eta zuzen idatzi dela.

Ez dira diruz lagunduko errotulu elebidunak, nahitaezkoa izango da euskaraz bakarrik egotea. Era berean, ez da laguntzarik emango izen berezia bakarrik agertzen denean; establezimenduaren jarduera euskaraz adieraztea hartuko da irizpidetzat.

Aurkeztu beharreko agiriak:

  • Eskabidea beteta

  • Euskaraz jarritako errotuluaren edo toldoaren faktura (2020koa) eta ordaindu izanaren agiria

  • Jarritako errotuluaren argazkia

  • Hirugarrenen alta emateko agiria, banketxean sinatuta eta zigiluz jota, aurrez aurkeztu ez bada.

Interesdunek Euskara Zerbitzuan eta Udalaren webguneko dirulaguntzen atalean izango dituzte eskura deialdiari buruzko xehetasun guztiak. Eskaera telematikoki egiteko aukera ere badago, Herritarren Atarian.

Kartelen eta itzulpen laburren zerbitzua:

Euskara Zerbitzuak merkatari eta ostalariei bestelako laguntza batzuk ere eskaintzen dizkie. Esaterako, euskarazko kartelak egiten ditu (merkealdikoak, ordutegiak, ohar pertsonalizatuak) eta itzulpen laburrak egiten lagundu ere bai: menuak, zerrendak… Horretarako, nahikoa da 943865025 zenbakira deitzea (6 luzapena) edota mezu bat idaztea euskara@zumaia.eus helbidera