Narrondo eta Iraeta arteko bide berdearen obrak lehenbailehen hasteko eskatu diote Zestoako eta Zumaiako alkateek Foru Aldundiari

2023/03/03

Gipuzkoako Foru Aldundiak Narrondo eta Iraeta arteko bidea egiteko lanak 2019an hasiko zirela agindu zuela, eta, “oraindik hitza bete gabe” jarraitzen duela salatu dute Mikel Arregi eta Iñaki Ostolazak.

Zestoako eta Zumaiako alkateak Narrondon bildu dira gaur goizean. Urolako Bide Berdearen barruan, Narrondo eta Iraeta lotzeko bidegorriaren obrak hasi gabe jarraitzen dutela salatu dute, “Gipuzkoako Foru Aldundiak lanak 2019an hasiko zirela agindu bazuen ere”. Bide berdeak oinezkoentzako nahiz txirrindularientzako egokitutako bideak dira, eta Urolako Bide Berdearen planak Legazpi eta Zumaia lotzea jasotzen du. Gaur gaurkoz, ordea, ibilbidea etenda dago, Narrondo eta Iraeta artean ez delako biderik egokitu.

Gipuzkoako Mugikortasun eta Lurralde Antolaketa Departamentuak 2019an iragarri zuen Urolako Bide Berdearen Narrondo eta Iraeta arteko tartearen obrak hastear zeudela. Hiru urte beranduago, 2022ko otsailean, Narrondo eta Iraetaren arteko bide berdearen obraren proiektua burutzeko Eusko Jaurlaritza eta Gipuzkoako Aldundiaren arteko hitzarmena lantzen ari zirela iragarri zuten Iñaki Arriola Sailburuak eta Rafaela Romero Mugikortasun Diputatuak. Bigarren aldiz iragarri zuten proiektu honen hasiera, baina, alkateen esanetan, “gaur gaurkoz, ez da lan horiek egiteko inbertsio minimorik egin”.

Iñaki Ostolaza Zumaiako alkateak adierazi duenez, “urte luze bat pasa da obrak egiteko Eusko Jaurlaritza eta Foru Aldundiaren arteko hitzarmena iragarri zutenetik, eta oraindik ez dute Gipuzkoako Aldundiaren Gobernuko Kontseiluaren sinadura lortu”.

Gainera, Mikel Arregi Zestoako alkateak azaldu duenez, legealdiaren hasieran Foru Aldundiko Mugikortasun Sailarekin hala hitzartuta, Arroa Behea eta Urolako Bide Berdearen arteko loturaren obrak egin zituen Zestoako Udalak 2020an. "Lan horiek eta bide berdeak ez dute jarraipenik izan, ordea", azaldu du. Bere hitzetan “urte gehiegi pasa dira, eta bide berdea errealitatea bihurtzeko epeak luzeegiak izaten ari dira”.

Horiek horrela, bi alkateek Gipuzkoako Foru Aldundiari publikoki eskatu diote obrak lehenbailehen has daitezela, eta Urolako bailara osoa Bide Berdearen bidez lotu dezatela.

Narrondo eta Iraeta arteko bide berdearen obrak lehenbailehen hasteko eskatu diote Zestoako eta Zumaiako alkateek Foru Aldundiari
Mikel Arregi Zestoako alkatea eta Iñaki Ostolaza Zumaiako alkatea, Narrondon, bide berdea eteten den lekuan