'Zumaian zaintza zaintzen' jardunaldiak egingo dituzte azaroaren 22an

Zumaiako Udalarekin eta Prebentzio Mahaiarekin elkarlanean, zaintza lanen inguruko diagnostikoa egin du Elhuyar fundazioak azken hilabeteotan, herritarrek erantzundako galdetegietan eta bestelako datuetan oinarrituta. Prebentzio Mahaiaren barruan garatzen ari diren prozesuaren emaitzetako bat da honakoa, eta, aurrera begira gai berarekin lanean jarraitzeko asmoa dute. Urriaren 22ko jardunaldietan ikerketaren berri eman, eta, herriko beste zenbait eragilerekin batera, hausnarketarako bide emango dute. 18:00etatik 20:15era bitartean topaketa egingo dute Alondegiko Oxford aretoan.

Bi zati nagusi izango ditu jardunaldiak. Lehenengo, herrian zaintza lanen bueltan martxan dauden prozesuen berri emango dute: Pili Alberdi Gorrotxategi Udaleko Gizarte Zerbitzuetako buruak Zumaiako Prebentzio Mahaiaren barruan egindako lanaren berri emango du, eta, egin berri duten diagnostikoaren gako eta ondorio nagusiak azalduko ditu; jarraian, Maddi Altuna Galfarsoro mugimendu feministako kideak joan den urtean abiatutako Zaintzen duen Zumaia irudikatzen prozesuaren nondik norakoak azaldu, eta greba feminista orokorraren kokapena egingo du; azkenik, Ivonne Robles León Bizitza Zaintzeko elkarteko kideak zaintza zerbitzuak eskaintzeko duten proposamena aurkeztuko du. 15 minutu inguruko aurkezpena egingo du bakoitzak, eta, jarraian, galdera-erantzunetarako tartea izango da.

Jardunaldiaren bigarren zatian Ana Olaizola Antia zaintzailea eta Prebentzio Mahaiko kidea elkartuko zaie hiru mahaikideei. Zaintza sistema komunitarioa artikulatzeko elkarlanerako espazioak izango dituzte hizpide, eragileen beharrak azpimarratuz, eta prozesuetan topatutako indargune zein zailtasunak oinarri hartuta, aurre begirako lan-ildo posibleez ariko dira.

Topaketak klownkusioekin itxiko dituzte. Beatriz Egizabal klownak, umorea oinarri, jardunaldiaren ondorioak aurkeztuko ditu 30 minutuko bakarrizketa saioan.

Antolatzaileek azaldu dutenez, zaintzaren gaia mardula izan arren, gertutik eta herrira begirako proposamenak landuko dituzte saioan, eta hurrengo urteetarako erronkei aurre egiteko martxan jartzea da asmoa. Horrenbestez, zaintzaren gaiak zeharkatzen duen herritarrak eta gaiarekiko interesa duen oro gonbidatu dituzte jardunaldietara.

Zumaiako Prebentzio Mahaia zaintzaren gaiari lotutako erronka nagusienak identifikatu eta lantzeari ekin zion 2023an. Koordinazio mahaia eratu ondotik, hainbat saio zabal egin dituzte. Gizarte zerbitzuetako, osasun arloko eta nagusien egoitzetako ordezkari eta langileak, herriko eskoletako ordezkariak, zaintza lanetan zein boluntario moduan aritzen diren herritarrak, Nagusien Mahaiko kideak, mugimendu eta talde feministetako kideak... ari dira parte hartzen, baita udal ordezkari eta teknikariak ere. Prozesua dinamizatzeko Elhuyar fundazioaren laguntza izaten ari dira.

Albiste erlazionatuak