[BIDEOA] Zatoz Komentuko proiektua ezagutzera

Duela hilabete batzuk Kultur Topagunea ezaugarritzeko hainbat saio egin zituen Udalak herriko eragile eta kultur munduko norbanakoekin. Horrekin batera, Komentua eraberritzeko proiektua lantzen aritu da Udala.

Zumaiako Udalaren egoera ekonomikoa aztertuta, eta zenbait dirulaguntza eskatzeko asmoarekin, Zumaiako Udalak 2022rako aurrekontuetan Komentuaren eraberritze obrak abiatzeko beharrezko diru partida txertatzea onartu du. Ondobidean, 2022an zehar Komentuaren eraberritze obrak hasita egotea aurreikusten du Udalak.

Izapide horiek eginda, Komentua Kultur Topagunearen egitasmoa eta eraikinaren eraberritze proiektua zumaiar guztiei ezagutarazteko hainbat ekitaldi izango dira datozen asteotan. Proiektuaren xehetasunak azaltzeko, bideo batean bildu dituzte Komentuaren egitasmoa sustatu eta diseinuan parte hartu duten hainbat herritarren adierazpenak: Marina Bidasoro kultur zinegotzia, Miriam Romatet kultur teknikaria, Mila Bakedano Astindu dantza elkarteko kidea, Sofia Oria Musika Eskolako zuzendaria, Aitor Zubia Zetabi estudioko arkitektoa eta Esti Curiel aktorea dira azalpenak eman dituztenak.

Gainera, abenduaren 9tik 19ra bitartean erakusketa izango da Komentuko kaperan. Bertan, Komentua eraberritzeko proiektuaren planoak eta xehetasunak ikusteko aukera izango dute herritarrek.

Abenduaren 9an bertan (osteguna) aurkezpen ekitaldia izango da: proiektua egin duen arkitekto estudioko kideek 3D planoekin azalpenak emango dituzte, eta Kultur Topagunearen egitasmoaren inguruko xehetasunak azalduko dituzte. Abenduaren 11n (larunbata) bisita gidatua izango da -bisita gidatuan parte hartu nahi dutenen e-maila bidali beharko dute kulturetxea@zumaia.eus helbidera-.

Albiste erlazionatuak