'Kontakizunekin jolasean' tailerra egingo dute larunbat honetan Emakumeon* Etxean, Geuretik Sortuak ekimenaren barruan

Olatz Beobide, Nerea Arriola eta Maitane Perez aktore eta sortzaileak "euskalduntasunaren, erruaren, euskal identitatearen, eta euskal irriaren inguruko" antzezlan obra sortzen ari dira, Udalbiltzak bultzatutako Geuretik Sortuak proiektuaren barruan. Zumaian egingo dute egonaldia, eta herriko elkarte zein zumaiarrekin elkartuko dira datozen asteotan, haien kontakizunak oinarri hartuta, antzezlan bat sortzeko.

Lehenengo saioa Emakumeon* Etxean egingo dute. Kontakizunekin jolasean tailerra gidatuko dute. "Euskalduntasunari eta erruari buruz" hausnartu nahi dute, "euskal identitatearen eraikuntzan hartzen ditugun eta egokitzen zaizkigun motxila ezberdin guzti horiei buruz". Baina euskal irrian ere jarriko dute arreta: "euskal irria ere ezagutu nahi dugu; umorearen bidez, korapiloak eta zamak askatuko ditugu".

Horretarako, kontakizunean oinarritutako tailerra egingo dute larunbat honetan, hilaren 17an. Haien esanetan "kontakizunak elkar ezagutu eta trukatzeko tresna dira, ahozko transmisioaren bidez besteengana gerturatzeko modua". Hori horrela, jolas eta dinamiken bidez, partaideek kontakizunak partekatuko dituzte, "giro ludiko eta arinean". "Dibertitzea eta goiz ezberdin bat elkarrekin pasatzea izango da helburua, kontuak gora eta behera, istorioetan murgilduz eta haiekin gozatuz".  Tailerra euskaraz izango da, eta emakumeei* zuzenduta dago; 10:30ean hasi eta 12:30ean amaituko da saioa.

Albiste erlazionatuak