Oikiako eskola atzeko urbanizazio obrak amaitu dira

2020/07/24
Zumaiako Udalak amaitu egin ditu Oikiako eskola atzeko urbanizazio lanak. Iaz bizilagunen behar eta eskaerak entzun ostean egin zuen urbanizazio proiektu berria Udalak.

Oikiako eskola atzeko urbanizazioko obra amaitu du Zumaiako Udalak, azken erremateak faltan. Bertan futbito eta saskibaloiean jolasteko kantxa bat eraiki dira, oinezko bide irisgarria, errepidea egokitu eta zabaldu da eta eskola irteeran graderio bat eraiki da.

Eremu hau bukatzeke zegoen, aurreko urtera arte Udalak bertarako zuen proiektuak ez baitzuen Oikiako auzotarren adostasuna lortzen, beraien beharrak ez zituela asetzen irizten ziotelako. Iaz, Udalak auzotarrekin hainbat bilera egin zituen eta haien beharren arabera moldatu zuen proiektua.

Obrek 3 hilabete iraun dute eta aurrekontua 439.370,74€. Exekuzioa Urbycolan, S.L. enpresak egin du eta obrak udal teknikariek zuzendu dituzte.

Artadiko saneamendu lanak ere amaituta

Artadiko obra ere amaitu da, bertan Artadi auzoari ur zikinen sare orokorra egin zaio eta gas naturala eraman zaio. Era berean, Korta poligonoari ur hornidura 2. Ur biltegitik ziurtatu zaio, bi linea orokor edukiz urez hornitzeko industrialdea. Obraren aurrekontua 482.735,72€koa da eta Construcciones Mariezcurrena, S.A enpresak exekutatu du.