Solasaldia egingo dute ostegun honetan Mari kalean, Geuretik Sortuak ekimenaren barruan

2023/06/21

Olatz Beobide, Nerea Arriola eta Maitane Perez aktore eta sortzaileek gidatuko dute saioa, eta, euskalduntasunaren, erruaren eta euskal irriaren inguruko kontakizunak partekatzeko tartea izango dute zumaiarrek, "giro ludiko eta arinean". Solasaldia ostegun honetan (hilaren 22an) izango da, 19:00etan Mari kalean.

Olatz Beobide, Nerea Arriola eta Maitane Perez aktore eta sortzaileak "euskalduntasunaren, erruaren, euskal identitatearen, eta euskal irriaren inguruko" antzezlan obra sortzen ari dira, Udalbiltzak bultzatutako Geuretik Sortuak proiektuaren barruan. 

Hiru sortzaileak Zumaian daude egunotan, sormen egonaldian, eta zumaiarrekin eta bertako elkarteekin biltzen ari dira, haien kontakizunak oinarri hartuta, antzezlan bat sortzeko. Prozesu honetan "euskalduntasunari eta erruari buruz" hausnartu nahi dute, "euskal identitatearen eraikuntzan hartzen ditugun edo egokitzen zaizkigun motxila ezberdin guzti horiei buruz". Aldi berean euskal irria ere ezagutu nahi dugu, "geureaz eta gure artean umoreak laguntzen baikaitu korapiloak askatzen".

Herrian dauden bitartean "jendearekin elkartu, kontakizunak eta istorioak entzun, sentsazioak bildu, eta herria eta bere pluraltasuna ezagutu" nahi dutela azaldu dute. Horregatik, zumaiar oro gonbidatu nahi dute ostegun honetan egingo den saiora, "solasaldi ireki eta arin baten bidez, elkar ezagutu eta sorkuntza prozesu honetan parte hartzeko".

Joan den astean Emakumeon* Etxean egin zuten saio bat, eta ostegun honetan (ekainak 22) bigarren saio bat egingo dute, zumaiar guztiei irekia. Solasaldia 19:00etan izango da, Mari kalean. Hirugarren saio bat ere egingo dute ekainaren 27an (asteartea), antzerki tailer formatuan.

Solasaldia egingo dute ostegun honetan Mari kalean, Geuretik Sortuak ekimenaren barruan
Maitane Perez, Olatz Beobide eta Nerea Arriola aktore eta sortzaileak, Miriam Romatet kultur teknikaria eta Marina Bidasoro kultur zinegotziarekin.